பொருளடக்கத்திற்கு தாண்டவும் | Skip to navigation

Vikaspedia

முகப்பு பக்கம் / கல்வி / கல்வியின் முக்கியத்துவம் / இந்தியக் கல்விமுறை / கல்வி மேலாண்மையில் சமுதாயத்தின் ஈடுபாடு
பகிருங்கள்
கருத்துக்கள்
  • நிலை: திருத்தம் செய்யலாம்

கல்வி மேலாண்மையில் சமுதாயத்தின் ஈடுபாடு

கல்வி மேலாண்மையில் சமுதாயத்தின் ஈடுபாடு பற்றிய தகவல்கள் இங்கு கொடுக்கப்பட்டுள்ளன.

முன்னுரை

கல்வி ஒரு சமுதாயப் பணி. பள்ளி சமுதாயத்தின் ஒரு அங்கமாகும். பள்ளியில் பயிலும் மாணாக்கர்களை அவர்கள் வாழும் சமுதாயத்தில் சிறப்பாகப் பங்கேற்கத் தேவையான பயிற்சிகள் அளிக்கும் கடமையும் பொறுப்பும் பள்ளியையே சாரும். ஒரு சமுதாயத்தின் வளர்ச்சி அங்குள்ள பள்ளிகளின் வளர்ச்சியைப் பொறுத்தே அமையும். "ஆற்றல்களில் மிகச்சிறந்த ஆற்றல் மனித ஆற்றல்" என்றார் மார்ஷல் ஸ்டாலின். அத்தகைய மனிதனது மனத்தினைப் பக்குவப்படுத்தி, அவனைப் பண்புள்ளவனாக, நன்னெறியில் செல்பவனாக உருவாக்குவது கல்விக்கூடங்களின் தலையாய பணியாகும்.

கல்விச்சாலைகளின் செயல்பாடுகளை செம்மைப்படுத்தி முறையாகப் பயன்படுத்திக் கொள்வது சமுதயாத்தின் பொறுப்பாகும். கல்வி சமுதாய வாழ்க்கையோடு தொடர்புடையது. மனித வாழ்க்கையை வளப்படுத்துவதற்காக நம் நாட்டில் பல கல்வித்திட்டங்கள் செயல்படுத்தப்பட்டு வருகின்றன. அனைவருக்கும் கல்வி இயக்கம் என்பது ஒரு கூட்டு முயற்சியாக சமூகநீதியை நிலைநாட்ட, பள்ளி நிர்வாகத்தில் கிராம மக்கள் பங்கேற்புடன் பள்ளித்தேவைகளைக் கண்டறிந்து அவற்றை நிறைவேற்றி வருகின்றது. இன்றைய நிலையில் பள்ளி நிர்வாகத்தில் சமுதாயத்தின் ஈடுபாடும், பங்கேற்பும் பள்ளிச் செயல்பாடுகளின் மீது சமுதாயக் கண்காணிப்பும் மிகவும் அவசியமானதாகும்.

சமுதாய விழிப்புணர்வும் ஈடுபாடும்

இந்திய அரசியல் அமைப்புச் சட்டம் 45-வது பிரிவின் படி ஆறு முதல் பதினான்கு வயது வரை உள்ள அனைத்துக் குழந்தைகளுக்கும் கட்டாய இலவசக்கல்வி அளிக்க வழி வகுக்கப்பட்டுள்ளது. தமிழ்நாடு அரசு 1995-இல் தமிழ்நாடு சட்டமன்றத்தில் கட்டாயக் கல்விச் சட்டம் இயற்றியது. இந்நோக்கில் மைய, மாநில அரசுகள் பல்வேறு முயற்சிகள் எடுத்துவருகின்றன. இருப்பினும் அனைவருக்கும் ஆரம்பக்கல்வி என்ற நிலையினை இன்னும் முழுமையாக அடைய முடியவில்லை. அனைவருக்கும் கட்டாய இலவசக்கல்வி இலக்கை தேசிய அளவில் நிறைவேற்ற சமுதாயத்தின் விழிப்புணர்வும், பங்கேற்பும், மதிப்பீடும் உரிமையாளத்துவமும் மிகவும் இன்றியாமையாததாகும். இந்நோக்கிலேயே அனைவர்க்கும் கல்வி என்ற தேசிய முயற்சி ஒரு மக்கள் இயக்கமாக, மக்கள் முனைந்து பங்கேற்று நடத்தும் தீவிரச் செயலியக்கமாக வகுத்தளிக்கப்பட்டுள்ளது.

அனைவருக்கும் ஆரம்பக்கல்வி என்ற இலக்கினை அடைவதற்கு மக்களிடையே கல்வி பற்றிய விழிப்புணர்வை ஏற்படுத்த வேண்டும். அனைவருக்கும் கல்வி வழங்குவதில் நிலவும் இடர்பாடுகளைப் பற்றியும் அவற்றிற்குரிய தீர்வுகளை வழங்குவதில் ஒர் கூட்டுணர்ச்சியையும் ஒத்துழைப்புணர்வையும் மக்களிடையே வளர்க்க வேண்டும்.

அனைவருக்கும் கல்வி வழங்குவதில் கண்டறியப்பட்டுள்ள இடர்ப்பாடுகள் சில

  • அனைத்து மாணவர் சேர்க்கை
  • தேக்கம்
  • கழிவு
  • அனைத்துப் பெண் குழந்தைகளின் சேர்க்கை
  • இடைநீக்கம்.
  • பெற்றோர்களின் வறுமை.
  • குறைபாடுடைய கலைத்திட்டம்
  • தேவையான கற்றல் கற்பித்தல் பொருள்கள் இல்லாமை.
  • ஆசிரியர்கள் அடிக்கடி இடமாற்றம்.
  • கவர்ச்சியற்ற கற்பித்தல் முறைகள்.
  • சரியான மேற்பார்வையும், வழிகாட்டலும் இன்மை.
  • தகுந்த சேர்க்கைக் கொள்கை இன்மை.
  • கட்டாய வருகையை வலியுறுத்துவதில் தோல்வி.
  • ஆண்-பெண் இணைக்கல்விக்கு மறுக்கும் மனப்பாங்கு.
  • வகுப்பறைகள் பற்றாக்குறைவு.
  • போதாத சத்துணவு.
  • முழுமையில்லாத ஆரம்பப்பள்ளிகள் அதிக அளவில் இருப்பது.
  • பகுதி நேரப்பள்ளி வசதியின்மை
  • உள்ளூர் வட்டாரங்களில் கட்சிகளின் குறுக்கீடு
  • போதாத பண முதலீடு
  • பெருகிவரும் மக்கள் தொகை.
  • குழந்தைகளின் பெற்றோர்களுக்கு விழிப்புணர்வின்மை
  • குழந்தைப் பணியாளர்களைக் கண்டறிந்து மீட்டு, கல்வி கற்கச் செய்வதில் தொய்வு
  • குழந்தைகளுக்கும், பெற்றோர்களுக்கும், கிராம மக்களுக்கும் கல்வி விழிப்புணர்வின்மை
  • குழந்தைகளின் கல்வி வளர்ச்சிகளைத் தொடர்ந்து ஆண்டு முழுவதும் கண்காணித்தல்.
  • குழந்தைகள் மற்றும் பள்ளி ஆசிரியர்களுக்கிடையே இடைவெளி

கல்வி விழிப்புணர்வுப் பணிகள்

பள்ளிகள் சமுதாயத்தின் கல்வித் தேவைகளை நிறைவேற்றிக் கொள்வதற்காகவே நிறுவப்பட்டுள்ளன; பள்ளி சமுதாயத்தின் சொத்தாகும். பள்ளிகளைச் சரிவர நிர்வகிப்பதில் சமுதாயத்திற்குப் பெரும்பங்குண்டு. எனவே சமுதாயத்தின் அனைத்துத் தரப்பினருக்கும் கல்வி பற்றிய விழிப்புணர்வு இருந்தால் தான் அனைவருக்கும் ஆரம்பக்கல்வி என்ற குறிக்கோளை, நாம் அடைய முடியும். விழிப்புணர்வு ஒரு சமுதாயத்தில் குறைந்திருக்குமாயின் அதனை ஆர்வமூட்டி, சிறுகச்சிறுக நல்வழிப்படுத்தி, பயிற்சி தந்து பள்ளிக்கு உறுதுணையாக இருக்குமாறு ஆக்கிக் கொள்வது ஒரு தலைமை ஆசிரியரின் பொறுப்பாகும்.

அரசு ஆணை எண்.53 நாள் 26.04.2002இன் படி பள்ளி அமைந்துள்ள ஒவ்வொரு கிராமத்திலும் ஒரு கிராமக் கல்விக்குழு அமைக்கப்பட்டுள்ளது. கிராமக் கல்விக்குழுவில் கிராம அளவில் கல்வி விழிப்புணர்வு, கல்வித்தர மேம்பாடு, மதிப்பீடு ஆகிய பணிகள் மேற்கொள்ளப்படுகின்றன. அனைவர்க்கும் கல்வி நோக்கில் பின்வரும் பங்கு பணிகளை கிராம சமுதாயம் பங்கேற்றுச் செய்ய வேண்டுமென எதிர்பார்க்கப்படுகிறது.

ஒவ்வொரு கல்வி ஆண்டின் தொடக்கத்திலும் ஜூன் மாதம், முதல் வாரத்தில் பள்ளிச் சேர்க்கை மற்றும் தரமான கல்வி பற்றிய விழிப்புணர்வை மக்களிடம் உருவாக்குவதற்குக் கூட்டங்கள் / கலை நிகழ்ச்சிகள் நடத்துதல்.

  • ஆசிரியர்களும் பள்ளிக் குழந்தைகளும் கிராமக் கல்விக் குழுவும் இணைந்து கல்வி விழிப்புணர்வு ஊர்வலங்கள் நடத்துதல்.
  • விளம்பரங்கள் மூலமாகவும், மகளிர் சுய உதவிக்குழு மற்றும் கிராமக் கல்விக் குழுவுடன் இணைந்தும் வீடு வீடாகச் சென்று கல்வி பற்றிய விழிப்புணர்வை ஏற்படுத்துதல்.
  • பள்ளி ஆண்டின் தொடக்கத்தில் பள்ளிச் சேர்க்கை விழாவினைக் கிராமத்தில் நடத்தி, கல்வி விழிப்புணர்வைத் தூண்டுதல்.
  • துண்டுப்பிரசுரங்கள், தெருமுனைப்பிரசாரங்கள், வீதிநாடகங்கள் மூலமாக மக்களிடையே கல்வி பற்றிய விழிப்புணர்வை ஏற்படுத்துதல்.
  • பள்ளி வயதுக் குழந்தைகள் அனைவரையும் காலம் தாழ்த்தாது பள்ளியில் சேர்ப்பது. இடையில் நின்றுவிட்டவர்களை மீண்டும் பள்ளியில் சேர்ப்பது.
  • பள்ளியின் குடிநீர் வசதி, சாலை வசதிகள், தெருவிளக்கு, துப்புரவுப் பணிகள், சுற்றுச்சூழல் மேம்பாட்டுக்கு ஆவன ஆகியவற்றைத் திட்டமிட்டுத் தீர்மானங்களியற்றி நடைமுறைப்படுத்த வேண்டும்.

கல்வி மேலாண்மையில் சமுதாயத்தின் ஈடுபாடு

ஒன்றுபட்டால் உண்டு வாழ்வே - நம்மில் ஒற்றுமை நீங்கிடில் அனைவருக்கும் தாழ்வே நன்றிது தேர்ந்திடல் வேண்டும் - இந்த ஞானம் வந்தாற்பின் நமக்கெது வேண்டும்!

என மகாகவி பாரதியார் ஒற்றுமையின் பலத்தைப் பற்றியும்; ஒற்றுமையின்மையின் ஆபத்தைப்பற்றியும் எச்சரித்துள்ளார். பள்ளி ஆசிரியர்கள் அவ்வூரின் ஒற்றுமைக்காக நன்மைக்காகத் தொண்டாற்றிச் சமூக மதிப்பைப் பெறுவதே அவர்களீட்டும் முதல் ஊதியம்.

தங்களூர்ப் பள்ளியின் கல்வித் தரத்தை மேம்படுத்துவதற்காக, கல்வி மேலாண்மையில் உள்ளூர்ச் சமூதாயத்தின் ஈடுபாடு இன்றியமையாததாகும். பள்ளிகள் சமுதாயத்தின் வளர்ச்சிக்காகச் செயல்படுகின்றன. பள்ளிகளின் செயல்பாடுகள் மக்கள் வாழும் சமுதாயத்தின் நிலைமையை மேம்படுத்த வேண்டும். எனில் மக்களுக்குக் கல்வியின்பால் அக்கறையும் ஈடுபாடும் உண்டாக்குதல் உடனடி அவசியமாகும். மக்கள் தங்கள் ஊரில் உள்ள பள்ளியின் வளர்ச்சிக்காகத் தாமாகவே முன்வந்து ஆவன செய்ய வேண்டும். முன்வரவில்லையெனில் பள்ளி ஆசிரியர்கள் சமுதாயத்துடன் பழகித் திரட்ட வேண்டும். பள்ளி அமைந்துள்ள ஒவ்வொரு கிராமத்திலும் ஒரு கல்விக்குழு அமைக்கப்பட்டுள்ளது. கிராமக் கல்விக் குழுவின் வெற்றியே அப்பள்ளியின் வெற்றியாகவும் அமைகிறது.

கிராமக் கல்விக் குழுவின் பணிகள்

  • கிராமத்திலுள்ள அனைத்து பள்ளி வயதுக் குழந்தைகளையும் பள்ளியில் சேர்த்தல்.
  • அவர்களுக்குத் தரமான கல்வி கிடைக்கத் திட்டமிட்டு ஏற்பாடு செய்தல்.
  • பள்ளியில் சேர்ந்த குழந்தைகள் இடைநிற்றல் மற்றும் தேக்கம் ஏதுமின்றித் தொடர்ந்து பள்ளியில் படித்து எட்டு வகுப்பு வரையாகிலும் முடிக்கச் செய்தல்.
  • இடையில் நின்ற குழந்தைகளைக் கண்டறிந்து அவர்களைப் பள்ளிக்கு வருமாறு செய்தல்.
  • பள்ளியின் உள்ளிட்டுத், தளவாட வசதிகளை மேம்படுத்துதல்.

சமுதாயப் பங்கேற்புடன் கல்வி முன்னேற்றத்திற்காகத் திட்டமிடல், மேற்பார்வை, மதிப்பீடு மற்றும் உரிமையாளத்துவம்

சமுதாயம் என்பது ஒரு பெருங்குழு அமைப்பு ஆகும். அது ஒரே இனத்தைச் சார்ந்தவர்களாலேயோ இன, மொழி, சமூகப் பொருளாதார வேறுபாடுகள் உடையவர்களாலேயோ அமைந்திருக்கலாம். சமூகத்தைச் சார்ந்தவர்கள் அனைவரும் தாம் வாழும் இடத்தில் பொதுவாகத் தமக்கென ஒரு அடையாளத்தை ஏற்படுத்திக் கொள்கின்றனர். சமுதாயத்திற்குச் சுய ஆட்சி செய்யும் உரிமையும் கல்வி, சுகாதார, நிர்வாகப், பொதுநல மற்றும் அடிப்படை வசதிகள் சார்ந்த பிரச்சனைகளைத் தாமே தீர்த்துக் கொள்ளும் ஆற்றலும் உள்ளது. விழிப்புடைய சமுதாயங்கள் தங்களைச் சீரமைத்துக் கொண்டு தங்கள் தேவைகளைத் தாங்களே திட்டமிட்டு நிறைவேற்றிக் கொள்கின்றன. கல்வி ஒரு சமுதாயத்தின் அடிப்படைத் தேவை. அதனை அரசாங்கத்தின் நிதி உதவியோடும் சமுதாய வளங்களைக் கொண்டும், தங்கள் விருப்பங்களுக்கும் தேவைகளுக்கும் ஏற்ப நிறைவேற்றிக் கொள்ள முனைப்புடன் செயல்பட வேண்டும். அவ்வாறு அது முனைப்புடன் செயல்படவில்லையெனில் அதனை உடனிருந்து வழிகாட்டித் தகஅமைத்துக் கொள்ள வேண்டுவதும் ஒர் ஆசிரியரின் கடமையாகிறது. மாறாகச் சமுதாயத்தைப் பழித்துக் குறைகூறி உள்ளூர் அரசியலில் சிக்கிக் கொள்ளாது ஆசிரியர்கள் தன்னை நிலைப்படுத்திக் கொண்டு செயல்பட வேண்டும்.

கல்வி முன்னேற்றத்தில் சமுதாயப் பங்கேற்பின் அவசியம்

கற்றல் வகுப்பறைகளில் மட்டும் நிகழ்வதில்லை. குடும்பத்திலும், சமூகத்திலும், விளையாட்டிடத்திலும், பொதுமக்கள் கூடும் விழாக்கள் போன்ற பல்வேறு சந்தர்ப்பங்களிலும் கற்றல் நிகழ்கிறது. சமூகத்தின் ஒவ்வொரு உறுப்பினரும் குழந்தைகளுக்குக் கல்வி தருவதில் ஒரளவு பொறுப்பை வகிக்கின்றனர். குடும்பத்திற்கு வெளியேயும் உலகத்தவரோடும் தொடர்ந்து தொடர்பு கொண்டிருக்கும் வரை குழந்தைகளின் கல்விக்குப் பெற்றோர்கள் மற்றும் குடும்ப உறுப்பினர்கள் மட்டுமே பொறுப்பு என்று கூறமுடியாது.

சமூகத்தில் முக்கிய அங்கம் வகிக்கும் பல்வேறு சாதி,மத அமைப்புகளைச் சார்ந்தவர்களும் குடும்ப உறுப்பினர்களும் குழந்தைகளை நல்ல குடிமக்களாக வளர்ப்பது எப்படி? மற்றும் கற்றலில் தேர்ச்சி பெறச் செய்வது எப்படி? எனச் சொல்லித் தந்து அதன்படி செயல்படத் தேவையான ஆதரவையும் அளிக்க வேண்டும். சமுதாயம் மேம்படத் தேவையான திறன்களைக் குழந்தைகளுக்கு வழங்கி அத்திறன்களைச் செயல்படுத்தும் ஆற்றலை வெளிப்படுத்தும் தளங்களாகவே பள்ளிகள் செயல்படுகின்றன. எனவே பள்ளிகள் சமுதாயத்திலிருந்து தனித்து செயல்படும் நிறுவனங்களாக இருக்க முடியாது. சமூகத்தில் வாழும் ஒவ்வொரு உறுப்பினரும் வித்தியாசமான பங்களிப்பைக் கல்வி வளர்ச்சிக்காகத் தருவதால், அவர்களது பங்களிப்பை மேம்படுத்தவும், வலுப்படுத்தவும் அனைத்துப் பிரிவினரும் ஒருங்கிணைந்து செயல்பட பள்ளி ஒரு பாலமாக அமைய வேண்டும். பல்வேறு தரப்பட்ட மக்கள் ஒருங்கிணைந்து பாடுபடும்போது தரமான

கல்வி நிகழ்கிறது. சமூகம் மற்றும் பெற்றோர் தொடர்ந்து பள்ளியுடன் இணைந்து தம் பங்கு பணியைச் செய்திட, பள்ளி நிர்வாகிகளும் ஆசிரியர்களும் கிராமக் கல்விக் குழுவினரும் சேர்ந்து அயராது பாடுபட வேண்டும்.

கல்விச் சேவையில் சமுதாயப் பங்கேற்பு என்பது புதிய கருத்து அல்ல. இருபதாம் நூற்றாண்டின் முதல் பாதிக்காலம் வரை குழந்தைகளுக்குக் கல்வி புகட்ட வேண்டிய பொறுப்பு பெரும்பாலும் சமூகத்தினரிடமே இருந்தது. இந்தியாவில் வெற்றி பெறும் காலம்வரை கல்விச் செலவை ஏற்று, மக்களுக்குக் கல்வித் தொண்டாற்றியவர்கள் சமுதாயத்தினரே! கல்விப்புரவலர்களே!! பின்னரே கல்வியில் அரசின் பங்கேற்பு பரவலாக்கப்பட்டு நெறிமுறைப் படுத்தப்பட்டுள்ளது.

சமூகப் பங்கேற்பும் கல்வி வளர்ச்சியும்

சமூகப் பங்கேற்பு கல்வி வளர்ச்சிக்குப் பின்வரும் வழிகளில் துணை புரிகின்றது.

  • பள்ளிச் சேர்க்கை மற்றும் கல்வி விழிப்புணர்வுக் கூட்டங்களில் தீவிரமாகப் பங்கேற்றல்.
  • பள்ளி வயதுக் குழந்தைகளின் பெற்றோரிடம் கல்வியின் பயனை எடுத்துரைத்தல்.
  • பள்ளியில் பணிபுரிவோரைக் கெளரவித்தல்.
  • பள்ளியின் வளர்ச்சிப் பணிகளுக்காக வளங்களைத் திரட்டுதல்.
  • மாணவர்கள் பள்ளிக்கு ஒழுங்காக வருவதை உறுதி செய்தல்.
  • தொடர்ந்து கல்வி கற்றுத் தேர்ச்சி அடைவதை உறுதி செய்தல்.
  • பள்ளிக் கட்டிடப் பராமரிப்புப் பணிகளிலும், பள்ளி வசதிகளை மேம்படுத்தும் நடவடிக்கைகளிலும் அக்கறையோடு ஈடுபடுதல்.
  • ஆசிரியர் பற்றாக்குறையை நீக்க, கிராமத்திலுள்ள படித்தவர்களைத் தொகுப்பூதிய அடிப்படையில் நியமனம் செய்தல்.
  • மாணவர்களோடு நேரடித் தொடர்பு கொண்டு வகுப்பறைச் செயல்பாடுகளின் வளர்நிலையை உறுதி செய்தல்.
  • கிராமக் கல்விக் குழுக் கூட்டங்களில் தவறாமல் கலந்து கொள்ளுதல்.
  • பள்ளிகளில் நடத்தப்பெறும் அனைத்துக் கூட்டங்களுக்கும் தவறாமல் சென்று குழந்தைகளின் கற்றல் அடைவுகளையும் அவர்களது வகுப்பறை நடத்தை பற்றியும் நேரடியாக விசாரித்துத் தெரிந்து கொள்ளல்.
  • உள்ளூரிலுள்ள பண்பாட்டுப் பாரம்பரியத்தையும் தமக்குத் தெரிந்த கைவினைத் தொழில் நுட்ப அறிவையும் மாணவர்களிடையே பகிர்ந்து கொள்ளுதல்.
  • குழந்தைகள் கற்பதில் உள்ள சிரமங்களைக் களைய உதவுதல்.
  • பெண்கல்வியை ஊக்குவித்தல்.
  • ஆண் பெண் பாகுபாடுகளைக் களைதல்.
  • கல்வித் தர மேம்பாட்டுப் பிரச்சனைகளுக்கான காரணங்களை இனம் கண்டு அவற்றைக் களைய கிராமக் கல்விக் குழுவிற்கு உதவி செய்தல்.

திட்டமிடலும் மதிப்பீடும்

எந்த ஒரு செயலையும் சரியாகச் செய்து முடிக்கத் "திட்டமிடல்" இன்றியமையாததாகும். கல்வி வளர்ச்சி முழுமைக்கும் திட்டமிடுதல் அடிப்படையாகும். கல்வி வளர்ச்சிக்கான திட்டங்கள் தயாரிப்பதில் கல்விக் கொள்கைகள், நாட்டின் தேவைகள், நிதிவசதிகள், போன்ற யாவும் கருத்தில் கொள்ளப்பட வேண்டும். சிறந்த கல்வித் திட்டங்கள் உண்மையான, துல்லியமான புள்ளி விவரங்களின் அடிப்படையில் உருவாக்கப்பட வேண்டும்.

உடனடித் தேவைகள், எதிர்காலத் தேவைகள் ஆகிய இரண்டும் கவனிக்கப்படுதல் வேண்டும். நம் நாட்டின் ஐந்தாண்டுத் திட்டங்களில், பல கல்வி வளர்ச்சித் திட்டங்கள் முக்கிய இடத்தைப் பெற்றுவந்துள்ளன. இவை மைய அரசு, மாநில அரசு, மாவட்டங்கள் ஆகிய நிலைகளில் உருவாக்கப்பட்டு செயல்படுத்தப்படுகின்றன. ஆனால், அவையாவும் எதிர்ப்பார்க்கப்பட்ட விளைவுகளைத் முழுமையாகத் தர இயலவில்லை. எனவே இன்று பள்ளிகளின் நிலையிலிருந்து வளர்ச்சிக்குத் திட்டமிடுதல் என்பதன் முக்கியத்துவம் உணரப்பட்டுள்ளது. இதனைப் பள்ளி மேம்பாட்டுத் திட்டம் அல்லது நிறுவனத்திட்டமிடல் என்று அழைக்கின்றனர். இச்செயல்த்திட்டத்தை தலைமையாசிரியர், ஆசிரியர், பெற்றோர், மாணவர், சமுதாயம் யாவரும் ஒன்று சேர்ந்து உருவாக்க வேண்டும். இவ்வகைத்திட்டம் நுண்ணிலைத் திட்டம் எனவும் (Micro Plan) அழைக்கப்படுகின்றது.

நிறுவனத்திட்டமிடல் அல்லது பள்ளி மேம்பாட்டுத்திட்டத்தின் நோக்கங்கள்

  • நூற்றுக்குநூறு சேர்க்கை, தக்கவைத்தல், நிறைவேற்றுதல் செய்தல்.
  • பள்ளியின் அடிப்படை வசதிகளைப் பெருக்குதல்.
  • தலைமையாசிரியர், ஆசிரியர்கள் மற்றும் மாணவர்கள் ஒன்று சேர்ந்து இணைந்து செயல்படுதல்.
  • கிடைக்கக் கூடிய வளங்களை முழுமையாகப் பயன்படுத்துதல்.
  • சமுதாய வளங்களைத் திரட்டிப் பயன்படுத்துதல் சமுதாயப் பங்கேற்பு மற்றும் ஈடுபாட்டினை அதிகரிக்கச் செய்தல்.
  • பிறதுறைகளுடன் இணைப்புக்கு ஆவன செய்தல்.
  • தன்னார்வத் தொண்டு நிறுவனங்களின் சேவையைப் பயன்படுத்துதல்.
  • ஆசிரியர்கள், மாணவர்களின் ஆக்கத்திறன் படைப்பாற்றலை வளர்த்தல்.
  • பிற பள்ளிகளின் நிகழ்வுகளில் தம் பள்ளிக்கு ஏற்புடையவற்றைப் பயன்படுத்துதல். பள்ளிகளிடையே ஆரோக்கியமான போட்டி மனப்பான்மையை உருவாக்குதல்.
  • மாணவர்களின் பாடவாரியான கல்வித் திறனடைவைக் காலவாரியாகத் திட்டமிட்டு உயர்த்துதல்.
  • பாட இணை, துணைச் செயல்களை ஆண்டுநெடுகிலும் திட்டமிட்டு நடத்துதல்.

பள்ளிகளில் மாணவர் தர அடைவு குறைவாக உள்ளது; ஆங்கிலம், கணிதம் முதலிய பாடங்களில் போதிய அடைவு இல்லை என்பதையே பரவலாகக் குறைகூறித் தம்மூர் இலவசப்பள்ளிகளை விடுத்து சமுதாயத்தினர் தம்பிள்ளைகளை வெளியூர் கட்டணப்பள்ளிகளில் சேர்க்கின்றனர். மாறாக தாம் விரும்பும் கல்வித்தரத்தைப் பாடவாரியாக நிர்ணயித்து அவற்றை ஆசிரியர்கள் உதவி கொண்டு தம்மூர் இலவசப் பள்ளியிலேயே திட்டமிட்டு வென்றடையுமாறு நிறுவனத்திட்டங்கள் அமையவேண்டும். இவ்வாறு பெற்றோர் கருத்துக்களைப் பிரதிபலப்பனவாக நிறுவனத்திட்டங்கள் அமைவுற ஆசிரியர்கள் வழிகாட்டவேண்டும்.

இவ்வகை அணுகுமுறையால் உள்ளூர் அரசுப்பள்ளிகளில் மாணவர் சேர்க்கையை அதிகரிக்கவும், தக்கவைக்கவும் செய்யலாம். பள்ளி மாணவர் எண்ணிக்கை வெகுவாகக் கூடும். புதிய ஆசிரியர் நியமனங்களைப் பள்ளிகள் பெறலாம். பள்ளித்தரம் பேணப்படும்.

பள்ளிமேம்பாட்டுத் திட்டம் தயாரித்தலும் செயல்படுத்துதலும்

பள்ளியைப் பற்றிய முழுவிவரங்களையும்" பள்ளிவிவரப் படிவம், (School Profile) மூலம் சேகரித்து அவற்றில் வலுவானவை, வலுவற்றவை (Weakness), வாய்ப்புகள் (opportunities) எதிரிடையான கூறுகள் (Threats) என்ற நான்கு கூறுகளையும் ஆராய்ந்து தொகுத்த பின் அவற்றின் அடிப்படையில் பள்ளி மேம்பாட்டுத் திட்டம் உருவாக்கப்பட வேண்டும். பள்ளியைப் பொறுத்த வரையில் நீண்ட காலத்திட்டத்தை விட குறுகியகாலத் திட்டமே சிறந்தது. குறுகிய காலத்திட்டம் என்பது பள்ளியின் ஒராண்டிற்கான செயல்திட்டம் ஆகும்.

செயல்திட்டம் உருவாக்குவதில் கீழ்க்கண்டவர்களை ஈடுபடுத்துதல் அவசியம்.

  • தலைமையாசிரியர், ஆசிரியர்கள்.
  • சரக / ஒன்றியக் கல்வி அலுவலர்கள்.
  • அரசின் பிற துறை அலுவலர்கள்.
  • மாணவர், பெற்றோர்கள்
  • சமுதாய உறுப்பினர்கள்
  • தன்னார்வத் தொண்டு நிறுவனங்கள்
  • பெற்றோர் ஆசிரியர் கழக உறுப்பினர்கள்
  • கிராமக்கல்விக்குழு உறுப்பினர்கள்
  • பள்ளியின் கொடையாளர்கள்/புரவலர்கள்
  • ஊராட்சி ஒன்றிய அலுவலர்கள்
  • சத்துணவுத் திட்ட ஒருங்கிணைப்பாளர்
  • அங்கன்வாடி மையப் பணியாளர்
  • கிராம நிர்வாக அலுவலர்.
  • வட்டார வளமைய மற்றும் மாவட்ட ஆசிரியர் கல்விப் பயிற்சி நிறுவனக் கல்வியாளர்கள்.

மதிப்பீடு

எந்த ஒரு திட்டமும் செம்மையாகச் செயல்படுகின்றதா என்பதை உறுதி செய்ய மதிப்பீடு மிகவும் இன்றியமையாததாகும். பள்ளிமேம்பாட்டிற்காக உருவாக்கப்படும் திட்டம் குறுகிய காலத் திட்டம் என்பதால் ஒராண்டின் முடிவில் மதிப்பீடு மிகவும் இன்றியமையாததாகும். ஒராண்டின் முடிவில் திட்ட இலக்குகளையும், திட்டத்தின்படி மேற்கொண்ட செயல்பாடுகளையும், சந்தித்த பிரச்சனைகளையும், எடுத்த தீர்வுகளையும், குறிக்கோள்களின்படி பெற்ற அடைவுகளையும் ஆராய்ந்து அதன் அடிப்படையில் அடுத்த ஆண்டிற்கான திட்டத்தினை உருவாக்க வேண்டும். இதுபள்ளித் தரமேம்பாட்டிற்குத் தொடர் நிகழ்வாக அமைய வேண்டும். முன் ஆண்டில் நிறைவுறாதனவற்றை அடுத்த ஆண்டுத்திட்டத்தில் இலக்குகளுடன் இணைத்துக் கொள்ளலாம்.

சமுதாய உறுப்பினர்களும் அவ்வப்போது பள்ளிக்குச் சென்று திட்டங்களில் உருவாக்கிய செயல்கள் திறம்பட நடைமுறைப்படுத்தப்படுகின்றதா என்பதைச் சரிபார்க்க வேண்டும். தலைமை ஆசிரியரும்பிற ஆசிரியர்களும் ஒன்றுசேர்ந்து திட்டத்தின் நோக்கங்களை நிறைவேற்றிடப்பள்ளிச் செயல்பாடுகளை அவ்வப்போது மேற்கொள்ள வேண்டும். ஒன்றிய, மாவட்ட அளவிலான கல்வி அலுவலர்களும், மேற்பார்வையாளர்களும் திட்டநடைமுறைப்பாட்டில் வளர்நிலை காண வேண்டும்.

கல்வி நிர்வாகப் பொறுப்புகளைப் பரவலாக்குதலின் முக்கியத்துவம்

பதினான்கு வயது வரையிலான அனைத்துக் குழந்தைகளுக்கும் கல்வி வழங்குவதை உறுதிசெய்வதற்காக 2001-02 ஆண்டிலிருந்து "அனைவருக்கும் கல்வி இயக்கம்" என்ற மக்கள் இயக்கம் இந்தியா முழுவதிலும் செயல்பட்டு வருகின்றது. சமூக பொருளாதார காரணங்களினாலோ ஆண், பெண், இன வேறுபாடு காரணமாகவோ கல்விச் செயல்பாடுகளிலும் அடைவுகளிலும் காணப்படும் இடைவெளியை முற்றிலும் நீக்கி வாழ்க்கைக்கு உகந்த தரமான கல்வியை அவர்களுக்கு அளித்திட வேண்டும் என்பது இத்திட்டத்தின் மிக முக்கிய குறிக்கோளாக வரையறுக்கப்பட்டுள்ளது. சமூக, பொருளாதார வேறுபாடுகள் ஒவ்வொரு மாநிலத்திற்கும்/ மாவட்டத்திற்கும் நகரத்திற்கும் கிராமத்திற்கும் 1992 ஆம் ஆண்டு இந்திய அரசால் நிறைவேற்றப்பட்ட சட்ட நடவடிக்கைப்படி (73 ஆவது மற்றும் 74 ஆவது) அரசியலமைப்பின் சட்டச்சீர்திருத்தம்) உடல்நலம், குடும்பநலம் மற்றும் கல்வி வாய்ப்புகள் இவற்றைக் கிராம உள்ளாட்சிகளின் தனித்தன்மை வாய்ந்த தவிர்க்க இயலாத பொறுப்பாகவும், கடமையாகவும் ஆக்கப்பட்டுள்ளது. இச்சட்டத்தின் பரிந்துரைக்கிணங்க கிராமக் கல்விக்குழு மாவட்டத் தொடக்கக் கல்வித் திட்டத்தின் (DPEP) கீழுள்ள பள்ளிகள்தோறும் உருவாக்கப்பட்டுள்ளன.

மாவட்டத் தொடக்கக் கல்வித் திட்டத்தின் கீழ் உருவாக்கப்பட்ட கிராமக்கல்விக் குழு (VEC) எஸ்.எஸ்.ஏ. திட்டத்தின் கீழும் செயல்பட்டு வருகின்றன. கிராமக்கல்விக் குழு என்பது கல்வித்திட்டத்தின் அடிமட்டத்தில் இயங்கும் அதிகாரபூர்வமான நிர்வாகக் குழு ஆகும்.

"ஊராட்சி ஒன்றிய அளவில் கிடைக்கும் பல்வேறு தகவல்களைத் திரட்டி, ஆராய்ந்து, ஒருங்கிணைத்து அதன் அடிப்படையில் திட்டங்கள் தீட்டப்பட்டுச் செயல்படுத்தப்பட வேண்டும் இம்முறை தொடர்ந்து நடைபெற்றால்தான், அரசால் நடைமுறைப்படத்தப்படவுள்ள பல கல்வித்திட்டங்கள் முழுமையான பயனளிப்பனவாகச் செயல்பட முடியும் "என்பதை இந்திய தேசியக் கல்விக் கொள்கையின் (1986) செயல்திட்டம் (Programme of Action) வலியுறுத்துகிறது. எனவே கல்வி நிர்வாகத்தை, அதிகாரத்தைப், பொறுப்புக்களை மாநிலங்களுக்கும், மாவட்டங்களுக்கும், கிராமங்களுக்கும், பரவலாக்குதல் மிகவும் முக்கியமான சீர்திருத்தமாகும். அதிகாரப்பன்முகப்படுத்தும் திட்டம் செம்மையாகச் செயல்பட அம்மட்டத்திலுள்ள மக்கள் பிரதிநிதிகளும் அலுவலர்களும் முனைப்புடன் வழிகாட்ட வேண்டும்.

நிர்வாக அமைப்புகளும் அதன் பணிகளும்

கல்வி நிர்வாகப் பணிகளைப் பரவலாக்கும் நோக்கத்துடன் மாநில அமைப்புக்கு உதவியாகப் பின்வரும் அமைப்புகள் செயல்பட்டு வருகின்றன.

  1. மாநில திட்ட இயக்ககம்
  2. மாவட்ட திட்ட அலுவலகம்
  3. வட்டார வளமையம்
  4. கிராமக் கல்வி குழுமம்

மாநிலத் திட்ட இயக்ககத்தின் பணிகள்

  • மாநிலத் தொலைநோக்குத் திட்ட அறிக்கையையும் ஆண்டுத் திட்டஅறிக்கையையும் தொகுத்து அளித்தல்.
  • திட்ட ஆவணங்கள் தயாரிப்பதிற்கு கிராமம், வட்டாரம், மாவட்டம் ஆகிய நிலைகளில் பரவலான முறையில் திட்டச் செயல்களை வகுத்தும் தொகுத்தும் திட்ட ஆவணங்களை உருவாக்க வழிகாட்டுதல்.
  • அனைத்து நிலைகளிலும் திட்டமிடும் குழுவினருக்குத் திட்டமிடும் நடைமுறையில் பயிற்சி அளித்தல். கல்வி தொடர்பான அனைத்துத் தகவல்களையும் சேகரித்து அவற்றைப் பகுப்பாய்வு செய்து திட்டமிடல்,
  • திட்டமதிப்பீடு, திட்ட விளைவுகளைக் கண்டறிதல் ஆகியவற்றுக்குப் பயன்படுத்துதல். மாநில அளவிலான சமுதாயப் பங்கேற்பை உள்வாங்கித் திட்ட நடைமுறைப்பாட்டை மக்களியக்கமாக உரிய பிரதிநிதித்துவத்துடன் நடத்துதல்.
  • திட்டப் பணிகளுக்கான நிதியை, திட்ட ஆவணங்களின்படி மைய மாநில அரசுகளிடமிருந்து உரியகாலத்தில் பெற்று மாவட்டங்களுக்கு வழங்குதல்.
  • மாவட்டங்களில் நடைபெறும் திட்டப் பணிகளின் செலவின முன்னேற்றங்களைக் கண்காணித்து விரைவு நடவடிக்கைகளுக்கு ஆலோசனை வழங்குதல்.
  • மாவட்டத் திட்ட ஒருங்கிணைப்பாளர்களின் மீளாய்வுக் கூட்ட நடவடிக்கைகளில் திட்டப் பணிகளின் முன்னேற்றத்தைப் பரிசீலித்துத் திட்டப் பணிகளை விரைவுபடுத்த ஆலோசனை வழங்குதல்.
  • திட்டச் செலவினங்களுக்கான மாவட்டக் கணக்குகளைத் தணிக்கை செய்தல். மைய, மாநில அரசுகளுக்கு, திட்டச் செயலாக்க நிலை குறித்து அறிக்கைகளை அனுப்புதல்.
  • மாநில அளவிலும், மாவட்ட அளவிலும் ஆராய்ச்சி மற்றும் கண்காணிப்பு செயல்களை மேற்கொள்ளுதல்.
  • திட்டப் பணியாளர்கள், ஆசிரியர்களிடையே செயலாராய்ச்சியை ஊக்குவித்தல்.
  • திட்டநடவடிக்கையில் நெருங்கிய தொடர்புள்ள பள்ளிக் கல்வித்துறை, தொடக்கக் கல்வித்துறை ஆசிரியர் கல்வி, ஆராய்ச்சி பயிற்சித் துறை மற்றும் பள்ளி சாராக் கல்வித் துறை ஆகியவற்றுடன் ஒருங்கிணைந்து செயல்படுதல்.
  • மாவட்ட, வட்டார, கிராம நிலை அமைப்புகள், திட்டம் செயலாக்கத்துக்கான பிற அமைப்புகள் ஆகியவற்றின் செயல்பாடுகளை ஆய்வு செய்தல்,
  • திட்டத்தின் குறிக்கோள்களை நிறைவேற்றுவதற்கு அடிப்படை நிலை அமைப்புகள் அனைத்துக்கும் வழிகாட்டுதல்.
  • மாநில வளக் குழுக்களை ஏற்படுத்தி, அவற்றைத் திட்டக் கூறுகளின் செயலாக்கத்துக்குப் பயன்படுத்துதல்,
  • சிறப்புக் கவனக் குழந்தைகளுக்கான திட்டங்களைச் செயல்படுத்துதல். திட்டத்தின் அனைத்துக் கூறுகளிலும் புதிய செயல்பாடுகளை ஊக்குவித்தல்.
  • திட்டப் பணிகளுக்கான பயிற்சிகளுக்கு ஏற்பாடு செய்தல்.
  • கிராமக் கல்விக்குழு, பள்ளித் தொகுப்புக் கருத்தாய்வு மையம், வட்டார வள மையம், மாநிலத்திட்ட அலுவலகம் ஆகியவற்றின் செயல்பாடுகள், மாவட்டநிர்வாகத் தகவல் தொடர்பு முறைகள், அறிக்கைகள், கட்டுமானப் பணிகளின் முன்னேற்றம், பயிற்சி நடவடிக்கைகளின் முன்னேற்றம், சிறப்புக் கவனத்திற்குரிய குழந்தைகளுக்கான செயல்பாடுகளில் முன்னேற்றம், மாற்றுப் பள்ளிகளின் செயல்பாடுகள் முதவியவற்றைக் கண்காணித்தல்.

மாவட்டத் திட்ட அலுவலகத்தின் பணிகள்

  • மாவட்ட அளவிலான மக்கள் பிரதிநிதித்துவத்தை உள்வாங்கி மக்களியக்கமாக இதனை நடத்துதல்.
  • அனைவருக்கும் கல்வி இயக்கத் திட்டச் செயலாக்கம் மற்றும் கண்காணிப்பை மாவட்ட நிலையில் மேற்கொள்ளுதல்.
  • கிராம, வட்டார நிலை அமைப்புகளுக்குத் திட்டப் பங்கேற்பு முறையில் ஆவணங்கள் தயாரித்தல்.
  • பள்ளி வரைபடம் தயாரித்தல், நுண்ணலகுத் திட்டமிடல் ஆகியவற்றில் பயிற்சி வழங்குதல்.
  • கிராம, வட்டார அளவிலான திட்டங்களைத் தொகுத்து ஆண்டுத் திட்ட ஆவணத்தையும், தொலைநோக்குத் திட்ட ஆவணத்தையும் தயார் செய்தல். கிராம அளவிலும், வட்டார அளவிலும் திட்டக் குறிக்கோள்களையும் அடைவு நிலையையும் நிர்ணயித்து அதற்கான வழிகாட்டுதல்களை வகுத்துச் செயல்படுத்துதல்,
  • மேற்பார்வையிடல் மற்றும் கண்காணித்தல்.
  • பள்ளி வாரியாக மாணவர் சேர்க்கை, தொடர்ந்து கற்றல்,
  • இடைநிறுத்தம் குறித்துத் தொடர் ஆய்வு செய்தல்.
  • செயல்திட்ட கால அட்டவணையின்படி அனைத்துச் செயல்களையும் நடைமுறைப்படுத்துதல்.
  • முறையான ஆய்வுக் கூட்டங்கள் நடத்தியும், பள்ளிகள்,
  • வட்டார வள மையங்கள், பள்ளித் தொகுப்புக் கருத்தாய்வு மையங்கள்,
  • கிராமக் கல்விக் குழுக்கள் ஆகியவற்றை நேரில் பார்வையிட்டும் கண்காணிப்புச் செய்தல்.
  • குடும்பக் கணக்கெடுப்புத் தகவல்கள்,
  • பள்ளித் தகவல்கள் ஆகியவற்றைப் புதுப்புத்துப் பராமரித்தல்.
  • திட்ட நிதியினை உரிய அமைப்புகளுக்கு வழங்கி அவற்றைத் திறம்படப் பயன்படுத்துவதையும்,
  • வெளிப்படையான தன்மையையும் கண்காணித்தல்.
  • அடிப்படை வசதித் தேவைகைளைக் கண்டறிந்து அவற்றை நிறைவு செய்தல்.
  • சமுதாயப் பங்கேற்பு மூலம் மேற்கொள்ளப்படும் திட்டக் கூட்டப் பணிகளை மேற்பார்வையிடுதல்.
  • விழிப்புணர்வு இயக்கங்களை நடத்துதல்,
  • கிராமங்களில் நடைபெறும் விழிப்புணர்வு நடவடிக்கைகளைக் கண்காணித்தல்.
  • இடைநிற்றல், அடைவுநிலைக் குறைவு போன்ற பிரச்சனைகளைச் சமாளிக்க பிற அரசுத் துறைகள்,
  • சுய உதவிக்குழுக்கள், அரசு சாரா அமைப்புகள், ஆகியவற்றின் ஒத்துழைப்பை நாடுதல்.
  • மாவட்ட அளவிலும் வட்டார அளவிலும் நடைபெறும் பயிற்சித் திட்டங்களை மேற்பார்வையிட்டு மதிப்பீடு செய்தல்.
  • மாவட்ட அளவில் திட்டம் சார்ந்த ஆராய்ச்சிப் பணிகளை மேற்கொள்ளவும் ஆசிரியர்கள் செயலாராய்ச்சி மேற்கொள்ளுவதற்கான பயிற்சி நடவடிக்கைகளை மேற்கொள்ளவும் ஏற்பாடு செய்தல்.
  • மாநில அளவில் திட்டம் சார்ந்த ஆராய்ச்சிப் பணிகளை மேற்கொள்ளவும் ஆசிரியர்கள் செயலாராய்ச்சி மேற்கொள்ளுவதற்கான பயிற்சி நடவடிக்கைகளை மேற்கொள்ளவும் ஏற்பாடு செய்தல்.
  • மாநிலத் திட்ட அலுவலகத்துக்கு உரிய காலங்களில் காலமுறை அறிக்கைகளை அனுப்புதல்,
  • மாநில ஆய்வுக் கூட்டங்களில் பங்கேற்றல்.

வட்டார வள மையத்தின் பணிகள்

  • மாணவர் சேர்க்கை, தக்க வைத்தல்,
  • பள்ளிப் படிப்பினை முடிக்கச் செய்தல் ஆகிய குறிக்கோள்களை நூறு விழுக்காடு அடையும் வகையில் வீட்டுக் கணக்கெடுப்பு,
  • பள்ளித் தகவல் ஆகியவற்றைப் புதுப்பித்துப் பராமரித்தல்.
  • கிராம, வட்டார , அளவிலான திட்ட அறிக்கைகளைத் தொகுத்துத் தயாரித்து மாவட்டத் திட்ட அலுவலகத்துக்கு அனுப்புதல்.
  • வட்டாரவள மைய அளவிலான ஆண்டுத் திட்டப் பணிகளை வரையறுத்து, செயல்படுத்துதல் மற்றும் கண்காணித்தல்.
  • வீடுவாரியாகப் பள்ளிவயதுக் குழந்தைகளையும், பள்ளிக்கு வெளியில் உள்ள பள்ளி சேராத மற்றும் இடைநின்றவர்களையும் துல்லியமாகக் கணக்கிட்டு, அவர்களை மாற்றுப் பள்ளிகள் / இணைப்புக் பள்ளிகளில் சேர்க்க ஏற்பாடு செய்தல்.
  • பள்ளி / மாற்றுப்பள்ளிகள் தொடங்க நடவடிக்கை எடுத்தல். கிராமக் கல்விக்குழு மூலமாகப் பள்ளிக்கு வழங்கப்படும் பள்ளிமானியம், ஆசிரியர் மானியம், துணைக் கருவிகள் மானியம் ஆகியவற்றை வெளிப்படையாகவும் சரியாகவும் பயன்படுத்துவதை உறுதி செய்தல்.
  • வட்டார அளவில் நடைபெறும் கட்டடப் பணிகளைக் கண்காணித்து அவற்றின் தரத்தை உறுதி செய்தல்.
  • கிராம அளவிலும், வட்டார அளவிலும் கல்வி விழிப்புணர்வு முகாம்களை நடத்துதல் வட்டார அளவில் திட்ட வெற்றிக்காகப் பிற அரசுத் துறைகளுடனும், உதவிக் குழுக்களுடனும் அரசுசாரா அமைப்புகளுடனும் ஒருங்கிணைந்து செயல்படுதல்.
  • பள்ளித் தலைமையாசிரியர்கள் பங்கேற்கும் மீளாய்வுக் கூட்டங்களை நடத்தி, திட்டச் செயலாக்கத்தில் உள்ள இடர்ப்பாடுகளை அகற்றுதல்.
  • ஆசிரியர்களுக்குப் பணியிடைப் பயிற்சியையும், மாற்றுப் பள்ளிப் பயிற்றுநர்கள், பால்வாடி, அங்கன்வாடி பணியாளர்கள் ஆகியோருக்கும், கிராமக் கல்விக்குழு உறுப்பினர்களுக்கும் பயிற்சிகளையும் வகுத்து நடத்துதல்.
  • பயிற்சி அட்டவணை தயாரித்தல்.
  • மாவட்டத் திட்ட அலுவலர் நடத்தும் ஆய்வுக்கூட்டங்களில் பங்கேற்றல், மாதாந்திர அறிக்கைகளை அனுப்பிவைத்தல்.
  • வட்டார வள மையச் செயல்பாடுகளுக்கான செலவினக் கணக்குகளைப் பராமரித்துத் தணிக்கைக்கு அனுப்புதல். மேற்பார்வையாளர் மற்றும் ஆசிரியர் பயிற்றுநர்களின் ஆண்டு, மாத, வார, பணித்திட்டம் தயாரித்தல்.
  • பள்ளி மேம்பாட்டுத் திட்டம் தயாரித்தல்
  • ஆண்டுத் திட்ட அறிக்கை தயாரித்தல். செயல்திறன் குறைந்த பள்ளிகளை இனங்கண்டு தரவரிசை வழங்க நடவடிக்கைகளை மேற்கொள்ளல். வட்டார வள மையப் பணியாளர்கள் ஒவ்வொருவரும் செயல்திறன் குறைந்த பள்ளிகளில் 5 பள்ளிகளைத் தத்தெடுத்து மேம்படுத்துதல்.
  • (School Adoption Programme) பள்ளிகளைப் பார்வையிடுதல் (School visits) மாற்றுப் பள்ளிகளைப் பார்வையிடல்.
  • மழலையர் கல்வி மையங்களைப் பார்வையிடல். வட்டார அளவில் தரக் கண்காணிப்புக் குழு அமைத்தல்
  • (கல்வியாளர்கள், ஒய்வுபெற்ற ஆசிரியர்கள், கல்வி அலுவலர்கள், பெண்கள் ஆகியோரில் ஒவ்வொரு பிரிவிலும் ஒருவர் கண்காணிப்புக் குழுவில் இடம்பெற வேண்டும்). பள்ளித் தொகுப்புக் கருத்தாய்வு மையக் கூட்டங்களில் கலந்து கொள்ளல்.
  • கல்வி மேம்பாட்டுக்கான ஆராய்ச்சிப் பணிகளை மேற்கொள்ளுதல் மற்றும் ஆசிரியர்கள் செயலாராய்ச்சி நடவடிக்கைகளை மேற்கொள்ள வழிகாட்டுதல். மாவட்டத் திட்ட ஒருங்கிணைப்பாளர், மாவட்டத் திட்டக்கூடுதல் ஒருங்கிணைப்பாளர், மாவட்டத் திட்ட உதவி ஒருங்கிணைப்பாளர், உதவித் தொடக்கக் கல்வி அலுவலர், ஆகியோர் அனைவருடனும் மேற்பார்வையாளரும், ஆசிரியப் பயிற்றுநர்களும் ஒருங்கிணைந்து பணியாற்றுதல்.

கிராமக் கல்விக் குழுவின் பணிகள்

  • அனைவருக்கும் கல்வி இயக்கத் திட்டப் பணிகளில் கிராமக் குழுவினரும் பங்கேற்பதற்கு வசதியாக, அவர்களுக்கு அளிக்கப்படும் பயிற்சியில் கலந்து கொள்ளச் செய்தல்.
  • பள்ளியின் தேவைகளைக் கண்டறிந்து பள்ளித் திட்ட அறிக்கை தயாரித்தல் (School Plan Document) புதிய பள்ளி / மாற்றுப் பள்ளி தொடங்க நடவடிக்கை எடுத்தல்.
  • விழிப்புணர்வுக் கூட்டங்களை நடத்தி, சமுதாயத்தின் ஒத்துழைப்பு மற்றும் சமுதாயத்தை ஒன்றுபடுத்தித் திட்டத்தினைச் செயலாக்குதல்.
  • பள்ளிக்கு வழங்கப்பட்ட மானியத்தை முறையாகச் செலவிட்டு உரிய பயன் அடைதல். கிராமக் கல்விக் குழுத் தலைவரும், உறுப்பினர் செயலரும் நிதி அனைத்தையும் பராமரித்தல் வேண்டும்.
  • பள்ளிக் கட்டடம், கழிப்பறை வசதி, குடிநீர் வசதி, கட்டடம் பழுது பார்த்தல் போன்ற கட்டுமான வேலைகளைச் சமுதாய ஒத்துழைப்புடன் மேற்கொள்ளுதல்.
  • மக்களிடமிருந்து திரட்டப்படும் நிதியினைக் கொண்டு கட்டுமானப்பணிகளுக்குக் கூடுதலாகத் தேவைப்படும் நிதியைச் சரிகட்ட ஏற்பாடு செய்வதன் மூலம் பள்ளி, கிராமப் பொதுச் சொத்து என்னும் பொதுமை உணர்வை வளர்த்தல்.
  • பள்ளிவயதுள்ள அனைத்துக் குழந்தைகளையும் பள்ளியில் சேர்த்து எட்டாம் வகுப்பு வரையில் தொடர்ந்து படிக்கச் செய்தல். கல்வி விழிப்புணர்வு முகாம்கள் நடத்துதல்.
  • பள்ளியில் விழாக்கள் நடத்துதல், குழந்தைகளின் திறன்களை வெளிக்கொணரும் வகையில் பொது நிகழ்ச்சிகள், கருத்தரங்குகள் நடத்துதல். திட்டச் செயல்பாடு சிறப்பாக நடந்திட சமுதாய உறுப்பினர்களுடன் நெருங்கிய தொடர்பை ஏற்படுத்தித் தருதல். கல்வி உறுதியளிப்புத் திட்டத்தின் கீழ் மாற்றுப் பள்ளிகள் தொடங்க ஏற்பாடு செய்தல்.
  • பள்ளியில் சேராத குழந்தைகளையும் இடையில் நின்றவர்களையும் கண்டறிந்து அவர்களைப் பள்ளியிலோ, மாற்றுப் பள்ளியிலோ சேர்க்க ஆவன செய்தல். மாற்றுப் பள்ளிகளின், இணைப்புப் பள்ளிகளின் செயல்பாடுகளைக் கண்காணித்தல்.
  • கிராமக் கல்விப் பதிவேட்டினைப் (VER) பராமரித்து, அனைத்துத் தகவல்களையும் அதில் பதிவித்தல். பள்ளி அறிவிப்புப் பலகையில் திட்ட நடவடிக்கைகள் பற்றிய தகவல்களை எழுதி வைத்தல்.
  • பள்ளி தொடர்பான கட்டடப் பணிகளையும் பராமரிப்புப் பணிகளையும் மேற்கொள்ளுதல்.
  • மாதம் இருமுறை கூட்டம் நடத்திப் பள்ளி வளர்ச்சியை ஆய்வு செய்தல்.

ஆதாரம் : தமிழ்நாடு ஆசிரியர் கல்வியியல் ஆராய்ச்சி மையம்

3.26315789474
கருத்தைச் சேர்

(மேற்கண்ட தகவலில் உங்களுக்கு ஏதாவது கருத்துக்கள்/ஆலோசனைகள் இருந்தால், இங்கே பதிவு செய்யவும்)

Enter the word
நெவிகடிஒன்
Back to top