பொருளடக்கத்திற்கு தாண்டவும் | Skip to navigation

Vikaspedia

முகப்பு பக்கம் / சமூக நலம் / நிர்வாகம் / ஒரு நிறுமத்தின் மேலாண்மைக் கூட்டமைப்பு
பகிருங்கள்
கருத்துக்கள்
  • நிலை: திருத்தம் செய்யலாம்

ஒரு நிறுமத்தின் மேலாண்மைக் கூட்டமைப்பு

ஒரு நிறுமத்தின் மேலாண்மைக் கூட்டமைப்பு பற்றிய தகவல்களை இங்கே காணலாம்.

நிறும் மேலாண்மை (Company Management)

நிறுமச் செயல்பாடுகளின் மேலாண்மை இயக்குநர் அவையிடம் ஒப்படைக்கப்பட்டுள்ளது. இயக்குநர்கள் பங்குநர்களால் தேர்ந்தெடுக்கப் படுகின்றனர். பங்குநர்கள் நிறுமத்தின் உரிமையாளர்கள் (Owners,) ஆனால் அதன் மேலாண்மையில் அவர்களால் நேரடியாகப் பங்கேற்க இயலாது. ஆயினும் அவர்களால் தேர்ந்தெடுக்கப் பெற்ற அவர்களின் பிரதிநிதிகளான இயக்குநர்களின் கைகளில் அது ஒப்படைக்கப்பட்டிருப்பதால், பங்குநர்கள் நிர்வாகத்தில் மறைமுகமாகப் பங்கேற்போராக உள்ளனர் என்று கொள்ளலாம்.

இயக்குநர்களின் நிலை

இயக்குநர்கள், தங்கள் செயல்களை ஒட்டி- பொறுப்புகளை ஒட்டிப் பல்வேறு நிலைகளில் செயல்படுகிறார்கள்.

  • இயக்குநர்கள் - முகவர்களாக (Agents) : நிறுமத்தின் பொருட்டுப் பிறருடன் அவர்கள் ஒப்பந்தங்களில் ஈடுபடும்பொழுது நிறுமத்திற்காக ஆவணங்களில் (பத்திரங்களில்) கையொப்பமிடும்பொழுதும், நிறுமத்தின் முகவர்களாக இயக்குநர்கள் செயல்படுகின்றனர். முகவர் ஒருவர் தன் செயலால் முதல்வரை (Principal) கட்டுப்படுத்துவது போன்றே, இயக்குநர்கள் தங்கள் செயல்களால் நிறுமத்தைக் கட்டுப்படுத்துகின்றனர். அதாவது இயக்குநர்களின் செயல்கட்கு நிறுமம் பொறுப்பாகும்.
  • இயக்குநர்கள் - பொறுப்பாண்மையர்களாக (Trustees) : நிறுமத்தின் சொத்துக்களை நிர்வகிக்கும்பொழுதும், பயன்படுத்தும்பொழுதும் இயக்குநர்கள் பொறுப்பாண்மையர் (Trustee) நிலையில் செயல்படுகின்றனர். அவ்வாறே தங்களிடம் ஒப்படைக்கப்பட்டுள்ள அதிகாரங்களைப் பயன்படுத்தும்பொழுதும் அதே நிலையில் உள்ளனர். அதாவது பொறுப்பாண்மையர் ஒருவர் தம்மிடம் ஒப்படைக்கப்பட்டுள்ள சொத்துக்களை எவ்வாறு பயன்பெறுநர் (Beneficiary) நலனுக்காகப் பயன்படுத்த வேண்டுமோ, அதுபோன்றே, இயக்குநர்கள் தங்களிடம் ஒப்படைக்கப்பட்ட அதிகாரங்களையும், சொத்துக்களையும் நிறும நலன் கருதி மட்டுமே பயன்படுத்த வேண்டும். தங்கள் தனிப்பட்ட நலனை மேம்படுத்திக் கொள்ள-நிறுமச் சொத்துக்களையும் அதிகாரங்களையும் முறையற்ற வழியில் பயன்படுத்திச் சொந்த ஆதாயம் பெறும் செயலில் ஈடுபடக் கூடாது.
  • இயக்குநர்கள் – அதிகாரிகளாக : இயக்குநர்கள் நிறுமத்தின் அதிகாரிகள் போன்றும் செயல்படுகின்றனர். நிறும மேலாண்மையில் ஈடுபடும்பொழுது, அதன் முதன்மைச் செயலதிகாரிகள் (Chief Executive Officers) போன்று செயல்படுகின்றனர். ஆக, முகவர்கள், பொறுப்பாண்மையர், நிர்வாகிகள் (அதிகாரிகள்) போன்ற அனைத்து நிலைகளையும் ஒன்றிணைத்து இயக்குநர்கள் செயல்படுகின்றனர் என்பதே உண்மை.

இயக்குநர்கட்கு இருக்க வேண்டிய தகுதிகள்

  1. தனி நபர்களை மட்டுமே நிறுமத்தின் இயக்குநர்களாக நியமிக்க முடியும்.
  2. ஒப்பந்தத் தகவுடைமை (Contractual capactiy) பெற்றவர்களாக இருக்க வேண்டும். அதாவது ஒப்பந்தச் சட்டத்தில் ஒருவர் ஒப்பந்தம் செய்ய சில தகுதிகள் கூறப்பட்டுள்ளன. அத்தகுதி உடையோர் எவரையும் இயக்குநராக நியமிக்க முடியும்.
  3. நிறுமச் செயல்முறை விதிகளில் கூறப்பட்டிருப்பின், குறைந்தது இத்துணைப் பங்குகளையாவது பெற்றிருக்க வேண்டும் என்று விதியிருப்பின், அத்தகுதிப் பங்குகளைப் பெற்றிருக்க வேண்டும். அல்லது இயக்குநராக நியமிக்கப்பெற்ற இரு மாதங்களுக்குள் அவற்றைப் பெற்றிட வேண்டும். தகுதிப் பங்குகளின் இயல்மதிப்பு ரூ.5000-க்கு மிகக் கூடாது. அல்லது பங்கொன்றின் முகமதிப்பே ரூ.5000-க்கு அதிகமாக இருப்பின், ஒரு பங்கு தகுதிப் பங்காகும்.

இயக்குநர்கள் தகுதியிழப்பு (Disqualification of Directors)

கீழ்க்கண்ட நபர்கள் ஒரு நிறுமத்தின் இயக்குநர்களாக நியமிக்கப் படுவதற்கு தகுதியிழந்தோராவர்.

  1. சமமனநிலை இழந்தவர் (Unsound mind) விடுவிக்கப் பெறா நொடிப்பு நிலை (திவால்) அடைந்தவர் (Undischarged insolvent), நொடிப்பு நிலை அடைந்தவராகக் கருதுமாறு விண்ணப்பம் செய்துள்ள நபர், தகாத நடத்தைப் பற்றிய குற்றத்திற்காக ஆறு மாதங்களுக்கு மேலான சிறைத் தண்டனை பெற்ற நபர், (சிறைவாசம் முடிவுற்ற நாளிலிருந்து 5 ஆண்டுக்காலம் செல்லாமலிருக்க வேண்டும்). ஐந்தாண்டுக் காலம் கழிந்தபின்னர் தகுதியுடையவராகிறார்.
  2. அழைப்புப் பணம் கோரப்பட்டும் செலுத்தாமல் ஆறு மாதங்களுக்கு மேல் நிலுவைவைத்திருக்கும் நபர், மேலாண்மையில் மோசடி செய்த காரணத்தால் இயக்குநராக நியமிக்கப்பெறும் தகுதியை நீதிமன்றத்தால் இழக்க நேரிட்ட நபர்.

இயக்குநர்கள் நியமனம்

ஒரு நிறுமத்தின் முதலாவது இயக்குநர்கள் வழக்கமாக நிறுமத்தின் செயல்முறை விதிகளில் பெயர் குறிப்பிடப்பட்டிருப்பதன் மூலம் நியமனம் பெறுகின்றனர். செயல்முறை விதிகள் இதுகுறித்து ஒன்றும் தெரிவிக்கவில்லையெனில், அமைப்பு முறையேட்டில் கையொப்பம் இட்டவர்கள் நிறுமத்தில் முதலாம் இயக்குநர்களாகக் கருதப்பெறுவர்.

அ. நிறுமம் நியமிக்கும் இயக்குநர்கள்

பின்னர், வழக்கமாக ஒவ்வோராண்டும் ஆண்டுப் பொதுக்கூட்டத்தில் பங்குநர்களால் தேர்ந்தெடுக்கப் படுவதன் மூலம், இயக்குநர்கள் நியமனம் பெறுகின்றனர். சுழல் முறை பதவி விலகல் முறையை நிறுமம் ஏற்றுக் கொண்டிருந்தால், இயக்குநர்கள் எண்ணிக்கையில் மூன்றிலொரு பகுதியினர் சுழல்முறையில் பதவி விலக வேண்டும். பதவி விலகிடும் இயக்குநர்கள் மீண்டும் தேர்ந்தெடுக்கப்பட்டு நியமனம் பெறலாம்.

ஆ. இயக்குநரவை நியமிக்கும் இயக்குநர்கள் கூடுதலான இயக்குநர்கள் வேண்டப்படின், கூடுதல் இயக்குநர்களை இயக்குநர் அவையே நியமிக்கலாம். இறப்பு, பதவி விலகல் போன்ற சூழ்நிலைகளில் அவ்வப்பொழுது, தற்காலிகமாக எழும் காலி இடங்களை, இயக்குநரவையே நியமித்து நிரப்பலாம். மாற்று இயக்குநர்களையும், இயக்குநர் அவை நியமிக்கலாம். செயல் முறை விதிகள் அதிகாரம் வழங்கியிருக்குமேயானால், இயக்குநரவை சாதாரணமாகக் கூடும் மாநிலத்திலிருந்து மூன்று மாதங்களுக்குக் குறையாமல் இயக்குநர் ஒருவர் வெளிச்சென்று இருப்பதால் இயக்குநரவைக் கூட்டத்தில் கலந்துகொள்ள முடியா நிலையில், மாற்று இயக்குநர் ஒருவரை இயக்குநரவை நியமித்துக் கொள்ளலாம்.

இ. மூன்றாம் தரப்பினர் நியமிக்கும் இயக்குநர்கள்

செயல்முறை விதிகள் அதிகாரம் வழங்கியிருக்குமாயின், நிறுமத்திற்குத் தொழிலை விற்றவர், அல்லது நிறுமத்திற்குக் கடன் வழங்கியிருக்கும் வங்கி அல்லது நிதி நிறுவனங்கள் இயக்குநரவைக்குத் தங்கள் சார்பில் பிரதிநிதிகளை இயக்குநர்களாக நியமிக்கலாம்.

ஈ. மைய அரசு நியமிக்கும் இயக்குநர்கள்

நிறுமச் சட்ட அவை (Comany Law Board) அளித்த ஆணையின் அடிப்படையில் அல்லது நிறுமத்தில் குறைந்தது 100 உறுப்பினர்கள் அல்லது மொத்த வாக்கு எண்ணிக்கையில் 10 சதவிகிதம் அளவிற்கு வாக்கு வைத்திருக்கும் உறுப்பினர்கள் விண்ணப்பித்திருப்பின், அதனடிப்படையில் மைய அரசு இயக்குநர்களை நியமிக்கும்.

இயக்குநராகப் பணியாற்ற உச்ச வரம்பு

ஒரே நேரத்தில் ஒரு நபர் 15 நிறுமங்களில் இயக்குநராகப் பதவி வகிக்கலாம். உச்சவரம்பான 15 நிறுமங்களைக் கணக்கிடுகையில், பிற நிறுமங்கள் தலையீடின்றி தன் விருப்பப்படி இயங்கக்கூடிய தனி வரையறு நிறுமங்களையும் (Independent Privarte companies), இலாப நோக்கற்ற நிறுமங்களையும், ஒரு இயக்குநருக்கு மாற்றாக இருக்கக்கூடிய இயக்குநர் பதவியையும் (Alternative Directorship) சேர்க்கக் கூடாது.

இயக்குநர் நீக்கம்

பதவிக் காலம் முடியுமுன்னரே இயக்குநர் ஒருவரை சாதாரணத் தீர்மானம் நிறைவேற்றிப் பதவியிலிருந்து நிறுமம் நீக்கிவிடலாம். ஆனால் அவ்வாறு நீக்கப்பட்ட அவர், மோசடி நோக்கில் செயல்பட்டிருக்க வேண்டும். அல்லது தனது பொறுப்பாண்மை நிலைக்குக் குந்தகம் ஏற்படுமாறு நிறும நலனை ஒதுக்கிவிட்டுச் சொந்த ஆதாயத்துக்காகச் செயல்பட்டிருக்க வேண்டும்.

சில குறிப்பிட்ட சூழ்நிலைகளில் மைய அரசு இயக்குநர் ஒருவரை பதவியினின்றும் நீக்கலாம்.

நிறுமச் செயல்பாடுகளில் பங்குநர்களைக் கொடுமைப்படுத்தும் வகையிலும், நிர்வாகம் சீர்கேட்டடையும் வகையிலும் செயல்பட்டு வருவதாகக் குற்றம் சுமத்தப்பட்டு விண்ணப்பித்திருப்பின், அதனை ஆய்ந்து அதனடிப்படையில் நிறுமச் சட்டத் தீர்ப்பாயம் (Company Law Tribunal) ஒருவரை இயக்குநர் பதவியிலிருந்து நீக்க முடியும்.

பதவி துறத்தல் (Vacation of Office)

கீழ்க்கண்ட சூழல்களில் ஒரு இயக்குநர் தன் பதவியைத் துறக்க வேண்டும்.

  1. தக்க நீதிமன்றம் அவரைச் சமமன நிலையிழந்தவர் (Unsound mind) என்று கண்டறிந்தால்.
  2. நொடிப்பு நிலை(Insolvent) அடைந்து விட்டதாக நீதிமன்றம் தீர்ப்பளித்திருந்தால்.
  3. குறிப்பிட்ட காலக்கெடுவுக்குள் தகுதிப் பங்குகளைப் பெறத் தவறிவிட்டால் அல்லது அதன் பிறகு எப்பொழுது அவற்றை வைத்திருக்கத் தவறிவிட்டாலும்.
  4. நெறிமுறைக்கு மாறான தீயபண்புகள் பற்றிய குற்றத்திற்காக ஆறு மாதத்திற்குக் குறைவாக சிறைத் தண்டனை வழங்கப்பட்டிருப்பின்.
  5. அழைப்புப் பணத்தை ஆறு மாதங்கள் வரை செலுத்தாமல் இருப்பின்.
  6. இயக்குநர் அவையின் இசைவு பெறாமல், இயக்குநரவைக் கூட்டங்களில் தொடர்ந்து மூன்று முறையோ, மூன்று மாதங்களில் நடைபெறும் அவைக் கூட்டங்கள் அனைத்திலுமோ இதில் எது அதிக கால அளவு உடையதோ, அதுவரை கலந்துகொள்ளாதிருப்பின்.
  7. நீதிமன்ற ஆணையின் பேரில் அவர் தகுதியிழக்க நேரிடின்.
  8. நிறுமம் ஈடுபடும் எவ்வொப்பந்தத்திலாவது தான் தொடர்புற்றிருப்பதைத் தெரிவிக்கத் தவறினாலும்.

இயக்குநர்கட்குரிய அதிகாரங்கள் (Powers)

பொது அதிகாரங்கள்

நிறுமம் எச்செயல்களில் ஈடுபட அதிகாரம் பெற்றுள்ளதோ, அந்த அனைத்துச் செயல்பாடுகளில் ஈடுபடவும், அவற்றிற்கு வேண்டிய அதிகாரங்களைப் பயன்படுத்தவும் ஒரு நிறுமத்தின் இயக்குநரவைக்கு உரிமை உண்டு. ஆயினும் நிறுமம் எச்செயலையாவது பொதுக்கூட்டத்தில் நிறைவேற்றப்பட்ட தீர்மானத்தின்படிதான் செய்ய வேண்டும் என்றிருப்பின், அதனை இயக்குநர் தானே செய்யக்கூடாது.

சட்டமுறை அதிகாரங்கள் (Statutory Powers)

இயக்குநர் அவைக் கூட்டங்களில் தீர்மானங்கள் நிறைவேற்றி, கீழ்க் கொடுக்கப்பட்ட அதிகாரங்களைப் பயன்படுத்திக் கொள்ளலாம்.

  1. அழைப்புப் பணம் செலுத்துமாறு கோரிட
  2. கடனீட்டுப் பத்திரங்களை வெளியிட
  3. கடனீட்டுப் பத்திரம் வெளியிடாமல் வேறுவகையில் கடன் பெற
  4. நிறுமத்தின் நிதியினை முதலீடு செய்ய
  5. கடன் வழங்க.

இயக்குநரவைக் கூட்டத்தில் பயன்படுத்தக் கூடிய பிற அதிகாரங்கள்

  1. இயக்குநர் பதவியில் காலியிடம் இருப்பின், அதனை நிரப்ப.
  2. செயல்முறை விதிகள் அதிகாரம் வழங்கியிருப்பின், கூடுதல் இயக்குநர்களை நியமித்துக் கொள்ள.
  3. செயல்முறை விதிகள் அதிகாரம் வழங்கியிருப்பின், மாற்று இயக்குநர் ஒருவரை நியமிக்க.
  4. எந்த ஒரு இயக்குநரோ, அவருடைய உறவினரோ தொடர்புற்றிருக்கும் ஒப்பந்தங்கட்கு அனுமதி வழங்க
  5. ஆண்டுப் பொதுக் கூட்டத்தில் விளம்புவதற்காக (Declare) பங்காதாயச் சதவிகிதத்தைக் குறிப்பிட்டுப் பரிந்துரைக்க.
  6. அதே மேலாண்மையின் கீழ் இயங்கும் நிறுமங்களில் முதலீடு செய்ய
  7. நிறுமத்தின் முதலாவது தணிக்கையரை நியமிக்க.
  8. பதவி விலகலாலன்றி வேறு காரணத்தால் தணிக்கையர் பதவியில் எழுந்துள்ள காலியிடத்தை நிரப்ப.

இயக்குநர் அதிகாரங்களில் கட்டுப்பாடு

இயக்குநர் அவைகட்கு அதிகாரங்கள் நிரம்ப இருப்பினும், கீழ்க்கண்ட அதிகாரங்களைப் பங்குநர் பொதுக் கூட்டத்தின் இசைவு பெற்றாலொழிய பயன்படுத்த முடியாது. அதாவது, தாம் விரும்பியவாறு இயக்குநர்கள் செயல்பட முடியாது, பங்குதாரர்களின் ஒப்புதலுடன்தான் செயல்பட முடியும்.

  1. நிறுமத்தின் தொழில் முழுவதையும் அல்லது மிகப் பெரும்பான்மையானதை விற்க, குத்தகைக்கு விட அல்லது வேறுவகையில் பயன்படுத்த.
  2. இயக்குநர் ஒருவர் தரவேண்டிய கடனுக்குத் திருப்பிச் செலுத்தும் காலக்கெடுவை நீட்டிக்க.
  3. முன்னரே வாங்கப்பட்ட கடன் தொகையுடன் தற்பொழுது வாங்கவுள்ள கடனையும் சேர்த்தால், அது நிறுமத்தின் செலுத்தப்பெற்ற முதல் தொகையும் காப்புத் தொகையும் சேர்த்த தொகைக்கு அதிகமாயிருப்பின், தற்பொழுது திட்டமிட்டுள்ள கடன் பெற.
  4. குறிப்பிட்ட வரம்பு கடந்து அறக்கொடை வழங்க.

இயக்குநர்களின் கடமைகள்

பொதுவான கடமைகளை கீழே காண்போம்

  1. நிறுமத்தின் நலன் காக்கும் வகையில் நல்லெண்ணத்துடன் செயல்பட வேண்டும். இரகசிய ஆதாயம் பெறும் நோக்குடன் செயலாற்றக் கூடாது.
  2. தங்கள் கடமைகளை போதிய கவனத்துடனும் விழிப்புடனும் ஆற்றிட வேண்டும்.
  3. இயக்குநர் அவைக் கூட்டங்களில் தவறாது கலந்துகொண்டு ஈடுபாட்டுடன் கருத்துக்களை வழங்கவேண்டும்.
  4. தனிப்பட்ட ஆர்வஞ் செலுத்திக் கடமைகளைச் செய்யவேண்டும். சட்டமுறை விதிகட்கு உட்பட்ட வரையறைக்குள்தான் அதிகாரங்களை ஒப்படைவு (Delegation) செய்ய வேண்டும்.

சட்டமுறைக் கடமைகள்

மேலே விவரிக்கப் பெற்ற பொதுக் கடமைகள் மட்டுமின்றி, இயக்குநர்கட்கு நிறுமச் சட்டமே சில கடமைகளை வரையறுத்துள்ளது. அவற்றைக் கீழே காண்போம்.

  1. தகவலறிக்கையில் கையொப்பமிடல், பின்னர் அதனைப் பொதுமக்களிடம் வெளியிடு முன்னர், நிறுமப் பதிவாளரிடம் தாக்கல் செய்தல்
  2. பங்குகள் வேண்டி விண்ணப்பித்தோரிடமிருந்து பெற்ற பணம் முழுவதையும், ஒரு அட்டவணை வங்கியில் (Scheduled bank) போட்டு வைத்தல்.
  3. குறைந்தளவுப் பங்கெடுப்புப் பெறா முன்னர் ஒதுக்கீடு செய்ய முனையாமலிருத்தல்.
  4. சட்டமுறைக் கூட்டம் நடைபெறும் நாளுக்குக் குறைந்தது 21 நாட்களுக்கு முன்னராவது சட்டமுறை அறிக்கை ஒன்றைத் தயாரித்து அனைத்து உறுப்பினர்கட்கும் அனுப்பி வைத்தல்.
  5. இயக்குநரவைக் கூட்டத்தை மூன்று மாதங்களுக்கு ஒரு முறையாவது நடத்துதல்.
  6. ஓர் ஒப்பந்தத்தில் இயக்குநர் யாருடனாவது ஈடுபாடு அல்லது தொடர்பு வைத்து இருப்பின், எவ்விதத்தில் தான் அதில் தொடர்புற்றவர் என்ற விவரத்தை வெளியிடுதல்.
  7. ஒவ்வோராண்டும் ஆண்டுப் பொதுக் கூட்டத்தைக் கூட்டுதல்.
  8. குறிப்பிட்ட அதிகாரிகளிடம் அவ்வப்பொழுது சட்டம் குறிப்பிடும் விவரங்களையும் அறிக்கைகளையும் தாக்கல் செய்தல்.
  9. தன் விருப்பக் கலைப்பின்போது (Voluntary winding up) கடன் அடைக்கப் போதிய சொத்துக்கள் நிறுமத்தில் உள்ளதெனும் வகைஉடைமை உறுதி விளம்பல் (Declaration of Solvency) தாக்கல் செய்தல்.

இயக்குநர்களின் பொறுப்புகள்

உரிமையியல் பொறுப்புகள் (Civil Liabilities)

மூன்றாம் தரப்பினரிடம் (Third Parties) ஏற்க வேண்டிய பொறுப்புகள். இயக்குநர்கள் நிறுமத்திற்கோ, பங்குநர்கட்கோ அன்றி மூன்றாம் தரப்பினர்கட்குக் கீழ்க்கண்ட சூழ்நிலைகளில் பொறுப்பாவர்.

அ. அமைப்பு முறையேடு (Memorandum) அளித்துள்ள அதிகார வரம்பினை மீறிய ஒப்பந்தங்களில் அவர்கள் ஈடுபடும்பொழுது.

ஆ. தகவலறிக்கையில் உண்மைக்குப் புறம்பான செய்திகள் காணப்படின், அவற்றிற்காக.

இ. தங்கள் தனிப்பட்ட பெயரில் நிறுமத்திற்கான ஒப்பந்தங்களில் ஈடுபடும்பொழுது.

நிறுமத்திற்கு ஏற்கவேண்டிய பொறுப்புகள்

கீழ்க்கண்ட சூழ்நிலைகளில் இயக்குநர்கள் நிறுமத்திற்குப் பொறுப்பாவார்கள்.

அ. தங்கள் கடமைகளை ஆற்றும்பொழுது முற்றிலும் கவனமின்மைக் குற்றத்திற்காக.

ஆ. பொறுப்புறுதி மீறலுக்காக (Breach of trust)

இ. நிறும நலன் மேம்பாடு கருதி நேர்மையாகச் செயல்புரியத் தவறும்பொழுது.

ஈ. சட்டமீறல் குற்றம் (Misfeasance) இழைக்கும்பொழுது.

உ. நிறுமத் தொழிலில் மோசடி செய்தமைக்காக.

குற்றவியல் பொறுப்பு (Criminal Liability)

கீழ்க்கண்ட செய்கைகட்காக இயக்குநர்கள் குற்றவியல் பொறுப்புக்கு உள்ளாக வேண்டியிருக்கும்.

அ. தகவலறிக்கையில் பொய்யான தகவல் கொடுத்தமைக்கு.

ஆ. பங்கு ஒதுக்கீட்டு அறிக்கையைத் தாக்கல் செய்ய தவறும்பொழுது.

இ. குறிப்பிட்ட காலக்கெடுவுக்குள் பங்குச் சான்றிதழை வழங்கத் தவறியதற்காக

ஈ. பங்காதாயம் விளம்பப்பட்ட 42 நாட்களுக்குள் அதற்குப் பணம் வழங்கத் தவறினால்

உ. ஆண்டுப் பொதுக் கூட்டத்தில் தணிக்கை செய்யப்பட்ட இலாப-நட்டக் கணக்கையும், இருப்பு நிலைக் குறிப்பையும் தாக்கல் செய்யத் தவறும் பொழுது.

ஊ. நிறுமத் தணிக்கையரிடம் தேவையான தகவல்களைக் கொடுக்க தவறும்பொழுது.

எ. சிறப்புத் தீர்மானங்கள் நிறைவேற்றப் பட்டிருப்பின், அவற்றை நிறைவேற்றிய 30 நாட்களுக்குள் பதிவாளரிடம் தாக்கல் செய்யத் தவறும்பொழுது.

ஏ. முக்கியமான ஆவணங்களை அழித்தமைக்காக.

ஐ. முழுமையான தனி வரையறு நிறுமங்களைத் தவிர வேறு பொது வரையறு நிறுமங்களில் 15க்கு மேல் இயக்குநர் பதவி வகிப்பின், அதற்காக.

மேலாண்மை இயக்குநர் (Managing Director) பொருள்.

நிர்வாகத்தின் மிகு அதிகாரங்களைப் பெற்றிருக்கும் இயக்குநர், மேலாண்மை இயக்குநர் எனப்படுகிறார். அப்பதவியை அவர் வகிக்கவில்லையெனில் மேலாண்மை அதிகாரங்கள் அவருக்குக் கிடைக்காது. வழக்கமான, நடைமுறை நிர்வாகப் பணிகளை மேலாண்மையின் மிகு அதிகாரங்கள் என்ற சொற்களில் அடக்கலாகாது.

மேலாண்மை இயக்குநர் ஒருவர் கீழ்க்கண்ட வழிகளில் நியமிக்கப்படுகிறார்.

  1. நிறுமத்துடன் செய்துகொண்ட ஓர் ஒப்பந்தத்தின் விளைவாக.
  2. அமைப்புமுறையேட்டில் அல்லது செயல்முறை விதிகளில் அடங்கியுள்ள விதிகளின் விளைவாக
  3. இயக்குநரவை அல்லது நிறுமப் பொதுக் கூட்டத்தில் நிறைவேற்றப்பெற்ற தீர்மானத்தையொட்டி.

மேலாண்மை இயக்குநர் குறித்த கீழ்க்கண்ட சட்ட விதிகளைக் கருத்திற் கொள்ளுதல் நலம்

  1. மேலாண்மை இயக்குநரின் நியமன நிபந்தனைகளில் மைய அரசின் ஒப்புதலின்றி மாற்றம் எதையும் செய்யக்கூடாது.
  2. ஒரு மேலாண்மை இயக்குநரை ஒரே தடவையில் ஐந்தாண்டுக் காலத்திற்கும் கூடுதலாக அமர்த்தக் கூடாது.
  3. ஒரே நேரத்தில் இரு நிறுமங்களுக்கு மேல் ஒரு நபர் மேலாண்மை இயக்குநராக பணியாற்ற முடியாது. ஒரு நிறுமத்தில் ஒரு மேலாண்மை இயக்குநர் மட்டும் இருந்தால், அவருடைய ஊதியம் ஆண்டு நிகர இலாபத்தில் 5 விழுக்காட்டிற்கு மிகாமல் இருக்க வேண்டும். ஒன்றிற்கு மேற்பட்ட மேலாண்மை இயக்குநர்கள் இருப்பின், அனைவருடைய ஊதியமும் சேர்த்து 10 விழுக்காட்டிற்கு மிகக் கூடாது. மாதச் சம்பளமாகவோ அல்லது நிகர இலாபத்தில் குறிப்பிட்ட விழுக்காடு அடிப்படையில் அல்லது இவ்விரண்டு வழிகளிலுமோ அன்னாரின் ஊதியத்தை வழங்கலாம்.

மேலாளர் (Manager)

மேலாளரும் மேலாண்மை இயக்குநரும் ஏறக்குறைய ஒரேமாதிரியான பணிகளைத்தான் செய்கின்றனர். இருவருக்குமிடையே உள்ள முக்கிய வேறுபாடு, ஒரு இயக்குநர் மட்டுமே மேலாண்மை இயக்குநராக இருக்க முடியும். ஆனால் மேலாளர் இயக்குநராக இருக்க வேண்டியதில்லை.

ஒரு தனி நபர் மட்டுமே மேலாளராக நியமனம் பெறமுடியும். இயக்குநரவையின் மேற்பார்வைக்கும், கட்டுப்பாட்டுக்கும், வழிகாட்டுதலுக்கும் உட்பட்டு, நிறுமச் செயல்பாடுகள் முழுவதையுமோ, பெரும் பகுதியையோ மேலாண்மை செய்யும் பொறுப்பு மேலாளரிடம் ஒப்படைக்கப்படுகிறது.

மேலாளர் குறித்து, பிற விதிமுறைகள்.

  1. ஒரு நிறுமத்தில் ஒன்றுக்கு மேற்பட்ட மேலாளர்கள் இருக்க முடியாது.
  2. ஒரு நிறுமச் செயல்பாடு முழுவதையுமே மேலாண்மை செய்யும் பொறுப்பு மேலாளரிடம் ஒப்படைக்கப் படுமாதலால், மேலாளரின் அதிகாரங்கள் ஒரு மேலாண்மை இயக்குநரின் அதிகாரங்களைவிடப் பரவலானது.
  3. மேலாளருக்கு வழங்கக்கூடிய ஊதியம், ஆண்டின் நிகர இலாபத்தில் 5 சதவிகிதத்திற்குக் கூடுதலாக இருக்கக் கூடாது.
  4. ஒரே நேரத்தில் 5 ஆண்டுக்கு மேல் ஒருவரை நியமனம் செய்யக்கூடாது.

மேலாண்மை ஊதியம் (Managerial Remuneration)

மேலாண்மை ஊதியம் என்பது மாதம்தோறும் செலுத்தத்தக்கதாகவோ, நிகர இலாபத்தில் குறிப்பிட்ட விழுக்காடு என்றோ, கழிவு அடிப்படையிலோ - எப்படியும் இருக்கலாம். மேலாண்மையர்க்கு, நிறுமம் செய்து கொடுக்கும் வசதிகளின் மதிப்பும் இதிலடங்கும். குறிப்பிட்ட எந்த ஆண்டிலும் ஒரு பொது வரையறு நிறுமம் கொடுக்கக் கூடிய ஒட்டுமொத்த மேலாண்மை ஊதியம் அதன் நிகர இலாபத்தில் 11 விழுக்காட்டிற்கு மிகக் கூடாது. ஒரு மேலாண்மை இயக்குநரின் ஊதியம் நிகர இலாபத்தில் 5 விழுக்காட்டிற்கு மிகுதியாக இருக்கக் கூடாது. அத்தகைய இயக்குநர்கள் ஒருவருக்கு மேற்பட்டவர் இருப்பின், அனைவருக்கும் சேர்த்து நிகர இலாபத்தில் 10 சதவிகிதத்திற்குக் கூடுதலாக இருக்கக் கூடாது.

ஓராண்டில் இலாபம் இல்லையெனிலோ, போதிய இலாபம் இல்லையெனிலோ நிறுமங்கள் சட்டத்தில் கூறியுள்ளவாறு குறைந்தளவு ஊதியம் கொடுக்கப்படலாம்.

நிறுமச் செயலர் (Company Secretary)

நிறுமங்கள் சட்டப்படி, நிறுமச் செயலர் என நிறுமச் செயலர்கள் சட்டத்தில் கூறியுள்ளவாறு உள்ளவரே நிறுமச் செயலர் ஆவர். அச்சட்டத்தில் வகுக்கப்பட்டுள்ள தகுதிகளுடைய எவரையும், செயலர் பணியை அல்லது பிற நிர்வாகப் பணியைச் செய்ய நியமிக்கப்பட்டிருப்பினும், அவரும் செயலராகவே கருதப்படுவர்.

நிறுமச் செயலர்கள் சட்டம் 1980-இன்படி, நிறுமச் செயலர் ஒருவர், இந்திய நிறுமச் செயலர்கள் அமைப்பில்(Institute of company Secretaries) உறுப்பினராக இருக்க வேண்டும்.

நிறுமச் செயலரின் முக்கியத்துவம்

சிறப்பு மிக்க அதிகாரியான செயலருக்குப் பரந்து விரிந்த கடமைகளும் பொறுப்புகளும் உள்ளன. சிக்கல் மிக்க சூழ்நிலைகளையும் வெகுவிரைவில் புரிந்து கொள்ளும் ஆற்றலையும், தீர்வு காணும் செயல்திறனையும் பொறுத்தே நிறுமத்தின் சீர்மிகு நிர்வாகம் நடைபெறுதல் அமைகிறது.

நிறுமம் வகுத்துள்ள திட்டங்களை நிறைவேற்றுவதிலேயே அவர் பெரும்பாலும் ஈடுபட வேண்டியிருப்பினும், நிறுமத்தின் சார்பில் முக்கியமான செயல்களை அவர் ஆற்ற வேண்டியுள்ளது. நிறுமத்தின் முகவராக அவர் செயல்படுவதில்லையெனினும், நிர்வாகத் தொடர்பான ஒப்பந்தங்களில் அவர் கையெழுத்திட வேண்டியுள்ளது. தொழில்மயமாதல் பெருகி வரும் நிலையில் நிறும நிர்வாகத்தில் சிக்கல் பெருகுகிறது. பல்வகைச் சட்ட நுணுக்கங்களை அறிந்து வைத்திருத்தலும், அவற்றைத் துல்லியமாகப் புரிந்து கொள்ள சட்டம், கணக்கியல், நிர்வாகம், தொழிலுறவு போன்ற அனைத்திலும் தெளிவான அறிவு தேவைப்படுகிறது. இதனால், செலுத்தப் பெற்ற பங்கு முதல் ரூ.50 இலட்சம் அல்லது அதற்குமேல் உள்ள ஒவ்வொரு நிறுமமும், உரிய தகுதிகளைப் பெற்றிருக்கும் நிறுமச் செயலரை நியமிக்க வேண்டும் என்று நிறுமங்கள் சட்டம் அதனைக் கட்டாயப்படுத்தி உள்ளது.

வருமான வரிச் சட்டம் 1961-ம், பிற சட்டங்களும் செயலரை நிறுமத்தின் முதன்மை அதிகாரியாக (Principal Officer) ஏற்றுக்கொள்வதிலிருந்து, செயலரின் முக்கிய பங்கினைப் புரிந்து கொள்ளலாம்.

நிறும மற்றும் இயக்குநரவைக் கூட்டங்களில் நிறைவேற்றப்படும் தீர்மானங்களையொட்டியே பெரும்பாலான செயல்கள் மேற்கொள்ளப்படுகின்றன. எந்தக் கூட்டத்தையும் சிறப்பாக நடத்த அனைத்து முன் முயற்சிகளையும் மேற்கொள்வது செயலர்தான்.

நிறுமத்தின் சார்பில் விளக்கம் தரக்கூடியவர் செயலரே. தன்னுடைய ஆளுமையின் மூலம், நேர்மை, காலத்திற்கேற்ப செயல்படுதல், தொழில் பற்றி முழு அறிவு போன்றவற்றாலும் நிறுமம் பற்றிய கருத்தை புகழ்வாய்ந்த ஒன்றாக உயர்த்துகிறார். நற்பெயர் ஈட்டிட வழிவகுக்கிறார்.

இயக்குநரவை சார்பில் அவர்கள் முகவர் போன்றே இருந்து, மேலாண்மைக்கும், ஊழியர்கள், பங்குநர்கள், வாடிக்கையர்- ஆகியோருக்குமிடையே உறவுப் பாலம் அமைக்கிறார். அவர்களிடையே எழும் கசப்புணர்வுகளை அகற்றி, தவறாகப் புரிந்துகொண்டிருப்பதைப் போக்கி, தன் ஊக்கத்தாலும், முனைப்பாலும், உறுதிமிக்க உள்ளத்தாலும் அவர்களிடையே அன்புமிக்க உறவை வலுப்படுத்துகிறார். மிகப் பிரம்மாண்டமான இன்றைய நிறுமங்களின் பிரச்சினைகளும் பலப்பல, பூதாகரமானவை. பல்வேறு துறைகளிலும் சிறப்பு நுணுக்க அறிவு பெற்ற ஆற்றலாளர்களின் ஆலோசனை கிடைப்பினும், அனைத்துத் துறையிலும் தனக்கிருக்கும் சிறப்பறிவின் மூலம், அனைவர் செயல்பாடுகளையும் ஒன்றிணைத்து, வெற்றிப்பாதையில் நிறுமச் செயல்பாடுகள், வீரநடை போட வைப்பது செயலர்தான் என்பதை உணர வேண்டும். நிறும் இயந்திரம் சுழன்று வரும் அச்சாணியாகவே செயலர் விளங்குகிறார் என்பதில் ஐயமில்லை.

நிறுமச் செயலரின் பணிகளும் கடமைகளும்

  1. நிறுமத்தின் செயலகத் துறையின் (Secretariat) தலைவர் என்ற முறையில், தன் கீழுள்ள அத்துறையின் நடவடிக்கைகளை மேற்பார்வை செய்து, கட்டுப்பாட்டில் வைத்திருத்தல்.
  2. நிறுமத்தின் முதன்மை அதிகாரி என்ற முறையில், உண்மைச் சான்றென உறுதியளிக்க வேண்டிய ஆவணங்களில் கையெழுத்திடுதல் அவருடைய பணி. இயக்குநரவைத் தலைவரிடம் கலந்தாலோசித்து, இயக்குநர் அவைக் கூட்ட நாள், இடம், நேரம் முதலியவற்றை முடிவு செய்தலும், அதன் நிகழ்ச்சி நிரலைத் தயாரித்து அதனைக் கூட்ட அறிவிக்கை (notice) யுடன் இணைத்தனுப்புதலும், கூட்டம் சிறப்பாக நடைபெற வேண்டிய அனைத்தையும் செய்தலும் அவருடைய பணியாகும்.
  3. இயக்குநர் அவைக் கூட்டத்தின் செயல்பாடுகள் நிறுமங்கள் சட்ட விதிமுறைகளுக்கு முரண்படாமலும், அமைப்பு முறை ஏடு, செயல்முறை விதிகள் ஆகியவற்றின் வரம்பு மிகாமலிருக்க பார்த்துக்கொள்ள வேண்டியது அவர்தம் பணிகளுள் சிறப்பான ஒன்றாகும். பங்குநர்களின் நலன் சிறக்கும் வகையில் செயலர் பணி செய்கிறார். அவர்களுடன் கூர்மதியுடன் நடந்துகொள்ள வேண்டும். பங்குநர் கூட்டங்களில் கடைப்பிடிக்க வேண்டிய சடங்குகள் அனைத்தையும் பின்பற்றிடவும், நிகழ்ச்சிக் குறிப்பேட்டில் கூட்டத்தில் நடைபெற்ற அனைத்தும் தவறின்றி பதிவு செய்து வைத்தலும் செயலரின் பணியும் கடமையுமாகிறது.
  4. பங்குநர்கள் எழுப்பும் வினாக்களுக்கும் ஐயங்கட்கும் உரிய முறையில் பண்பு காத்து, காலங்கடத்தாமல் பதிலளிக்க வேண்டும்.
  5. சட்டக் கட்டுப்பாட்டினை மனதில் இருத்தி, காக்கவேண்டிய இரகசியங்களைக் காத்தும், தெரிவிக்கக் கூடியவற்றைத் தெளிவாகத் தெரிவித்தும் பங்குநரின் மனநிறைவைப் பெறும்வகையில் நடந்துகொள்ள வேண்டும்.
  6. பங்கு ஒதுக்கீட்டு மடல், பங்குச் சான்றிதழ் வழங்கல், பங்காதாய ஆணை, பங்குகள் மாற்றுகை, பங்குகளை ஒறுப்பிழப்பு செய்தல் போன்ற பல்வேறு நடவடிக்கைகளிலும் அவருடைய பணி சிறப்பானதாகும். முதன்மை அலுவலர் என்ற முறையில் இயக்குநர் அவையுடன் அவர்க்கு நெருங்கிய தொடர்பு உண்டு. பல்வேறு துறைகளை ஒன்றிணைத்துச் செயல்படுதல் முக்கிய பணியாகும்.
  7. ஊழியர்கள், தொழிலாளர் ஒரு புறமும், மேலாண்மை மற்றொரு புறமுமிருப்பினும், அவர்களிடையேயும், நிறுமத்துடன் தொடர்பு கொண்ட வெளியாருடனும் சுமூக உறவு நிலவ உழைத்தலும் அவர் கடமையும் பணியுமாகும்.
  8. தங்கள் ஊழியர்களிடம் நம்பிக்கை ஊட்டி அவர்களின் உளமார்ந்த ஒத்துழைப்பைப் பெற வேண்டும்.

சட்டமுறைக் கடமைகள் (Statutory Duties)

  1. எச்சட்டத்தின் கீழாவது உண்மையெனச் சான்றளிக்க வேண்டியிருப்பின் (Authentication) அத்தகைய ஆவணத்தில் கையொப்பமிடல்.
  2. தகவலறிக்கைக்கு மாற்றறிக்கையைத் தாக்கல் செய்ய ஏற்பாடு செய்தல். ஒதுக்கீடு செய்த 3 மாதங்களுக்குள் பங்குச் சான்றிதழை அல்லது கடனீட்டுப் பத்திரத்தை வழங்கிட அவ்வாறே பங்கு மாற்றத்தில் இரு மாதங்களுக்குள் மாற்றுகை செய்திட-அனைத்துச் செயல்களையும் மேற்கொள்ளுதல்
  3. நிறுமத்தின் பதிவலுவலகம் உள்ள இடம் குறித்த அறிவிக்கையைத் தாக்கல் செய்தல்.
  4. தொழில் தொடக்கச் சான்றிதழ் பெற சட்டமுறை உறுதி விளம்பல் (Statutory declaration) செய்தலும், அவற்றைப் பதிவாளரிடம் தாக்கல் செய்தலும்.
  5. நிறுமத்தின் ஆண்டு அறிக்கையில் (Annual Return) கையொப்பமிடல்.
  6. நிறுமத்தின் ஒவ்வொரு உறுப்பினர்க்கும் பொதுக்கூட்ட அறிவிக்கையை அனுப்புதல்.
  7. பொதுக்கூட்ட, இயக்குநரவை அல்லது இயக்குநரவைக் குழுவின் கூட்ட நிகழ்ச்சிக் குறிப்புகளை, கூட்டம் நடைபெற்ற 30 தினத்திற்குள் தயார் செய்தல்.
  8. உறுப்பினர் பதிவேடு, கடனீட்டுப் பத்திரதாரர் ஏடு போன்ற சட்டமுறை ஏடுகளை உரிய முறையில் வைத்திருத்தல்.

பொதுக் கடமைகள்

தன்னுடைய கடமைகளை மிகுந்த கவனத்துடனும் நேர்மையுடனும் செய்தலும் தன் அதிகார எல்லையை மீறாது செயல்படலும்.

இரகசியமான செய்திகளை வெளியிடாது காத்தல்.

கூட்டங்கள் (Meetings)

நிறுமம் ஒரு சட்டம் ஏற்படுத்திய நபர் என்பதால் தன் பெயரிலேயே செயல் மேற்கொள்ள உரிமை உண்டு. ஆனால் அதற்கு உருவமோ உயிரோ இல்லாததால், அதன் உறுப்பினர்கள் மூலமோ, நிறும இயக்குநர்கள் மூலமோதான் அது செயல்பட வேண்டியுள்ளது. அவரவர் கூட்டங்களில் தீர்மானம் நிறைவேற்றுதல் மூலம் நிறுமம் செயல்படுவதாகப் பொருள். எனவே கூட்டங்கள் சிறப்பு பெறுகின்றன.

கூட்டம் - பொருள்

உரிய அறிவிக்கை மூலம் நிகழ்ச்சி நிரலில் குறிப்பிட்ட நிகழ்ச்சிகளை மேற்கொள்ள, நபர்கள் ஒன்றுகூடுதல் கூட்டம் எனப்படும்.

செல்லத்தக்க கூட்டத்திற்கு வேண்டிய நிபந்தனைகள்

ஒரு கூட்டம் செல்லத்தக்கதாக இருக்க வேண்டுமாயின், கீழ்க்கண்ட நிபந்தனைகள் நிறைவு செய்யப்பட வேண்டும்.

  • கூட்டம் உரிய முறையில் கூட்டப்பட வேண்டும். அதாவது, கூட்டத்தைக் கூட்டும் அதிகாரம் பெற்றவர்களால் அது கூட்டப்பட வேண்டும். கூட்டத்தைக் கூட்ட இயக்குநர் அவைக்கும், பங்குநர்கட்கும், நிறுமச் சட்ட அவைக்கும் (company Law Board) அதிகாரம் உண்டு.
  • சட்ட விதிகட்குட்பட்டு கூட்டம் அமைய வேண்டும். அதாவது, உரிய தலைவர் தலைமையில் நடைபெறுவதாலும், கூட்டத்திற்குச் சட்டம் வகுத்துள்ள குறைந்தளவு உறுப்பினர்கள் வருகை தருதலும் இன்றியமையாதவை.
  • சட்ட விதிமுறைகளின்படியும், செயல்முறை விதிகளின்படியும் கூட்டம் நடைபெற வேண்டும்.
  • முறைபிறழாது, நிகழ்ச்சி நிரலில் குறிப்பிட்ட நடவடிக்கைகளை மேற்கொள்ளும் வகையில் நடைபெற வேண்டும்.

பங்குநர்களின் கூட்டங்கள், இயக்குநரவைக் கூட்டம், இயக்குநர் குழுக் கூட்டம், கடனீட்டுப் பத்திரதாரர் மற்றும் கடனாளர் கூட்டங்கள் பற்றி மிகவும் சுருக்கமாக இனிக் காண்போம்

பங்குநர் கூட்டங்கள்

பங்குநர் கூட்டங்கள் மூவகைப்படும். சட்டமுறைக் கூட்டம், ஆண்டுப் பொதுக் கூட்டம், சிறப்புப் பொதுக் கூட்டம் என அவற்றை வகைப்படுத்தலாம்.

சட்டமுறைக் கூட்டம்(Statutory Meeting)

  • ஒரு பொது வரையறு நிறுமத்தில் பங்குநர்களின் முதல் கூட்டம் நிறுமங்கள் சட்டப்படி கட்டாயமாக்கப்பட்டுள்ளது. இதுவே சட்டமுறைக் கூட்டம் என்று அழைக்கப்படுகிறது.
  • பங்குகளால் வரையறுக்கப்பட்ட அல்லது பொறுப்புறுதியால் வரையறுக்கப்பட்ட ஒவ்வொரு வரையறு நிறுமமும் தொழில் தொடங்க உரிமை பெற்ற ஆறு மாதங்களுக்குள் ஒரு மாதத்திற்குப் பின்னர் இக்கூட்டத்தைக் கூட்ட வேண்டும்.
  • நிறுமத்தின் வாழ்வுக் காலத்தில் ஒரு முறை மட்டுமே நடைபெறும் கூட்டம் இது. நிறும் அமைப்பு, பங்கு முதல் வெளியீடு எந்தளவு வெற்றி பெற்றிருக்கிறது, வாங்கிய சொத்துக்கள் போன்ற விவரங்களைத் தெரிந்துகொள்ளும் வாய்ப்பைப் பங்குநர்கட்கு வழங்கவே இக்கூட்டத்தின் முக்கிய நோக்கமாகும்.
  • கூட்ட நாளுக்கு 21 நாட்களுக்கு முன்னர் கூட்ட அறிவிக்கையுடன் சட்டமுறை அறிக்கை என்ற அறிக்கையை அனைத்து உறுப்பினர்கட்கும் அனுப்பவேண்டும்.
  • சட்டமுறை அறிக்கையில் காணப்பெறும் செய்திகள் குறித்துப் பங்குநர்கள் விவாதிக்கலாம். தகவலறிக்கையில் கண்டுள்ள ஒப்பந்தங்களில் தேவையாயிருக்கும் மாற்றங்களையும் செய்யலாம்.

சட்டமுறை அறிக்கை

கீழ்க்கண்டவை சட்டமுறை அறிக்கையில் இடம்பெற வேண்டும்.

ரொக்கத்திற்கு மற்றும் ரொக்கத்திற்கன்றி வேறு மறு பயனுக்காக வெளியிடப்பட்டுள்ள பங்குகள் பற்றிய விவரங்கள்

  • பங்குகள் மீது பெற்ற மொத்த பணம் மற்றும் பிற வழிகளில் பெற்ற பணம் அறிக்கை தயார் செய்வதற்கு 7 நாட்களுக்கு முன்பு வரை பெற்ற பெறுதல்-செலுத்தல் பற்றிய சுருக்கமான கணக்கு.
  • தொடக்கச் செலவுகள் குறித்த மதிப்பீடு அல்லது செலவழித்தவை.
  • கூட்ட ஒப்புதலுக்காக வைக்கப்பட வேண்டியுள்ள ஒப்பந்தங்கள் மற்றும் அவற்றில் செய்ய வேண்டிய மாற்றங்கள் குறித்த விவரங்கள்
  • பங்கு ஒப்புறுதி (Underwriting) நிறைவேற்றப்படாத ஒப்பந்தங்களும், அதற்கான காரணங்களும்
  • பங்கு அல்லது கடனீட்டு வெளியீட்டில் இயக்குநர்களுக்குச் செலுத்தியுள்ள அல்லது செலுத்த வேண்டியுள்ள கழிவு அல்லது தரகுத் தொகை.
  • இயக்குநர்கள், மேலாண்மை இயக்குநர்கள், மேலாளர், செயலர் ஆகியோர் குறித்த விவரங்கள்
  • இயக்குநர்கள், மேலாண்மை இயக்குநர்கள் முதலியோரிடமிருந்து இன்னும் பெற வேண்டிய அழைப்புப் பணம் குறித்த விபரங்கள் குறைந்தது இரு இயக்குநர்கள் (அவற்றில் ஒருவர் மேலாண்மை இயக்குநராக இருக்க வேண்டும்).
  • சட்டமுறை அறிக்கை சரியானதுதான் என்று சான்றளிக்க வேண்டும். ஒதுக்கீடு செய்யப்பட்ட பங்குகள் மீது பெற்ற பணம், பிற வருவாய்கள், செலுத்தல்கள் குறித்து தணிக்கையர் ஒருவரால் அது சான்றளிக்கப்பட வேண்டும். சான்றளிக்கப்பட்ட சட்டமுறை அறிக்கையின் நகல் ஒன்றைப் பதிவாளரிடம் தாக்கல் செய்ய வேண்டும்.
  • உறுப்பினர் பட்டியலையும், அவர்கள் வைத்துள்ள பங்குகள் விவரங்களையும் கூட்டத்தின்போது உறுப்பினர்கள் பார்வையிடலாம். சட்டமுறைக் கூட்டத்தைக் கூட்டத் தவறின், ஏற்படும் விளைவுகள் குறிப்பிட்ட காலக்கெடுவுக்குள் சட்டமுறைக் கூட்டத்தைக் கூட்டத் தவறினாலோ, அல்லது பதிவாளரிடம் சட்டமுறை அறிக்கையைத் தாக்கல் செய்யத் தவறினாலோ, இத்தவறுதலுக்குக் காரணமான ஒவ்வொரு இயக்குநரும் அல்லது பிற அதிகாரியும் ரூ.5000 வரை அபராதம் செலுத்த வேண்டும்.

நிறுமத்தின் உறுப்பினர் ஒருவர் விண்ணப்பித்தால், நீதிமன்றம் நிறுமக் கலைப்பிற்கேக்கூட ஆணை பிறப்பிக்கலாம். சட்டமுறைக் கூட்டம் இத்தகைய சிறப்பு வாய்ந்தது.

ஆண்டுப் பொதுக் கூட்டம்(Annual General Meeting)

பிற கூட்டங்கள் மட்டுமின்றி, ஒவ்வொரு நிறுமமும், ஆண்டுப் பொதுக் கூட்டத்தைக் கூட்ட வேண்டும். நிறுமம் உருவாக்கப்பட்ட நாளிலிருந்து 18 மாதங்களுக்குள் நிறுமத்தின் முதல் ஆண்டுப் பொதுக்கூட்டத்தைக் கூட்ட வேண்டும். பின்னர் இரு ஆண்டுப் பொதுக்கூட்டங்கட்கிடையே உள்ள கால இடைவெளி 15 மாதங்களுக்கு மிகாமல் இருத்தல் வேண்டும். இக்கூட்டத்தில் மேற்கொள்ளப்படும் சாதாரண நடவடிக்கைகள் (Oridinary Business) :

  • ஆண்டு கணக்குகள், இயக்குநர் மற்றும் தணிக்கையர் அறிக்கைகளை விவாதித்து பெற்றுக் கொள்ளுதல்
  • பங்காதாயம் விளம்புதல் (Declaration)
  • பதவி விலகும் இயக்குநர் இடங்களில் இயக்குநர்களை நியமித்தல்.
  • தணிக்கையரை நியமித்து, அவருடைய ஊதியத்தையும் நிர்ணயம் செய்தல்

சிறப்பு நடவடிக்கைகள் (Special Business)

மேலே சுட்டிக்காட்டப் பெற்றவை தவிர, நிறைவேற்றப்படும் பிற தீர்மானங்கள் அனைத்தும் சிறப்பு நடவடிக்கைகள் எனப்படும். எடுத்துக்காட்டுகள்: இயக்குநரை நீக்குதல், உரிமை அல்லது மேலூதியப் பங்குகள் (Rights or Bonus shares) வெளியீடு, பதவி விலகும் இயக்குநருக்கு மாறாக, வேறொரு நபரை இயக்குநராக அமர்த்துதல் முதலியவை.

இக்கூட்டத்தைக் கூட்டத் தவறுவதின் விளைவுகள்

ஆண்டுப் பொதுக் கூட்டத்தைக் கூட்டத் தவறும் நிறுமமும், இதற்குக் காரணமான அதிகாரியும் ரூ.50,000 வரை அபராதம் செலுத்த வேண்டியிருப்பதுடன், கூட்டத் தவறு நீட்டிக்கும் ஒவ்வொரு நாளுக்கும் ரூ.2500 கூடுதல் அபராதம் செலுத்த வேண்டியிருக்கலாம்.

ஆண்டுப் பொதுக்கூட்டத்தின் சிறப்பு நிறுமச் செயல்பாடுகள் குறித்து தெரிந்துகொள்ளவும், விவாதிக்கவும், தங்கள் நலனைக் காக்கும் நடவடிக்கைகளை மேற்கொள்ளவும் இக்கூட்டம் பங்குநர்கட்கு வாய்ப்பினை நல்குகிறது.

அசாதாரண பொதுக்கூட்டம். (Extraordinary General Meeting) பொருள் சட்டமுறைக் கூட்டத்தையும், ஆண்டுப் பொதுக் கூட்டத்தையும் தவிர நடைபெறும் வேறு எந்தப் பொதுக்கூட்டமும் சிறப்புப் பொதுக்கூட்டம் அல்லது அசாதாரணப் பொதுக்கூட்டம் என்று அழைக்கப்படுகிறது.

ஒரு அவசரமான அல்லது சிறப்பான பொருள் குறித்த தீர்மானத்தை அடுத்த ஆண்டுப் பொதுக்கூட்டம் வரை தள்ளிப்போட இயலா நிலையில், இயக்குநர் அவை தானே முன் வந்தோ அல்லது சில நிபந்தனைகட்கு உட்பட்டு அதன் உறுப்பினர்கள் வேண்டுதலுக்கு இணங்கியோ இக்கூட்டம் கூட்டப்பெறுகிறது.

சட்டம் குறிப்பிட்ட அளவு எண்ணிக்கையுள்ளோர் சிறப்புக் கூட்டம் கூட்ட வேண்டும் என்று வேண்டுகோள் விடுத்தும், 21 நாட்களுக்குள் இயக்குநர் அவை, அதனைக் கூட்ட அழைக்காமல், வேண்டுகோள் விடுத்த நாளிலிருந்து 45 நாட்களுக்குள் கூட்டத்தை நடத்தவில்லையென்றால், வேண்டுகோள் விடுத்த நாளிலிருந்து 3 மாதங்களுக்குள் வேண்டுகோள் விடுத்தோரே கூட்டத்தை நடத்திக்கொள்ளலாம்.

நிறுமச் சட்ட அவையில் (Company law board) கூட்டப்படும் சிறப்புக்கூட்டம்

உறுப்பினர்களாலும் சிறப்புக் கூட்டத்தைக் கூட்ட இயலவில்லையென்றால், நிறுமச் சட்ட அவை (Company law board) தானே முன்வந்தோ , நிறும் இயக்குநர் எவருமோ அல்லது உறுப்பினரோ அளித்த விண்ணப்பத்தின் பேரிலோ அத்தகையக் கூட்டத்தைக் கூட்டலாம்.

இயக்குநர் அவைக் கூட்டங்கள் (Meetings of the Board of Directors)

இயக்குநர்கள் கூட்டங்கள் இயக்குநர் அவைக் கூட்டங்கள் அல்லது அவைக் கூட்டங்கள் என்றே அழைக்கப்படுகின்றன. நிறுமத்தின் திட்டங்கள், கொள்கைகள் இக்கூட்டங்களில்தான் வகுக்கப்படுகின்றன

இயக்குநரவைக் (Board) கூட்டத்திற்குரிய விதிமுறைகள்

மூன்று மாதங்களுக்கு ஒருமுறையேனும் அவைக்கூட்டம் கூட்டப்பட வேண்டும். ஒவ்வோராண்டிலும் குறைந்தது நான்கு கூட்டங்களாவது நடைபெற வேண்டும்.

இந்தியாவில் இருக்கும் ஒவ்வொரு இயக்குநருக்கும் அவருடைய வழக்கமான முகவரிக்கு அவைக் கூட்டத்தின் அறிவிக்கை எழுத்து மூலம் அனுப்பப் பெற வேண்டும்.

அவை உறுப்பினர்கள் மொத்த எண்ணிக்கையில் மூன்றில் ஒரு பங்கினராவது (பின்னமிருப்பின் அடுத்த ஒன்றாகக் கணக்கிட வேண்டும்) அல்லது இரு இயக்குநர்கள் ஆகிய இதில் எது அதிகமோ, அவ்வெண்ணிக்கையே கூட்டம் நடத்தத் தேவையான குறைவெண் (Quorum) ஆகும்.

நிறுமம், எத்தகைய அதிகாரங்களைப் பயன்படுத்தலாமோ, எத்தகைய செயல்களை மேற்கொள்ளலாமோ அவற்றை இயக்குநரவை செய்ய, மேற்கொள்ள உரிமை படைத்தது.

இயக்குநர் குழுக் கூட்டங்கள் (Meetings of Committee of Directors)

பல பொருட்களைத் தீர விசாரித்து, ஆய்ந்து முடிவெடுக்க நேரமின்மையால், நிறுமச் செயல்முறை விதிகள் அதிகாரம் வழங்குமாயின், இயக்குநர் குழு ஒன்றை அமைத்து குறிப்பிட்ட பொருள் குறித்து ஆழ்ந்து ஆராய்ந்து முடிவுகளைத் தெரிவிக்க அல்லது குறிப்பிட்ட செயல் மேற்கொள்ள கோரலாம். எடுத்துக்காட்டாக, கீழ்க்கண்ட அதிகாரங்களை இயக்குநர் குழுக்களிடம் ஒப்படைவு (Delegation) செய்யலாம்.

  • கேட்டவுடன் செலுத்த வேண்டியிராத பிற முறையில் பணம் கடன் வாங்கும் அதிகாரம்
  • நிறும் நிதிகளை முதலீடு செய்யும் அதிகாரம்
  • கடன் வழங்கும் அதிகாரம்

கடனீட்டுப் பத்திரதாரர் (Debentureholders) கூட்டம்

கடனீட்டுப் பத்திரதாரர்கட்கு வழங்கியுள்ள பிணைகளை ஈடுகளை) மாற்ற நிறுமம் விழையும்போது அல்லது அவர்களின் உரிமைகளில் அல்லது செலுத்த வேண்டிய வட்டி வீதத்தில் மாற்றம் செய்ய நினைக்கும்பொழுது, அன்னார்தம் கூட்டங்கள் கூட்டப்படும்.

கடனாளர் (Creditors) கூட்டங்கள்

கடனாளருடன் (கடன் அடைப்புத் தொடர்பான) ஏற்பாட்டுத் திட்டம் (Scheme of Arrangement) ஒன்றை செய்துகொள்ள விழையும்பொழுது கடனாளர்தம் கூட்டம் கூட்டப்பெறும்.

அ. பகராள் (Proxies)

ஒரு பொதுக் கூட்டத்தில் தனக்குப் பதில் கலந்துகொள்ள பகராள் ஒருவரை நியமிக்கலாம். பகராள் எனும் சொல், கூட்டத்தில் கலந்துகொள்ள உறுப்பினரால் நியமிக்கப்படும் ஒரு நபரைக் குறிக்கும். அதுமட்டுமல்லாமல், பகராளை நியமிக்கும் அப்பத்திரத்தையும் கூட பகராள் எனும் சொல் உணர்த்தக் கூடும். ஆக, அது பகராளையோ அல்லது பகராள் ஒருவரை நியமிக்கும் ஆணைப் பத்திரத்தையோ குறிக்கும்.

பகராள் குறித்த கீழ்க்கண்டவற்றைக் கருத்தில் கொள்ளுதல் நல்லது.

  • பங்கு முதலுடைய நிறும் உறுப்பினர்கட்கு பகராளை நியமிக்கும் உரிமை உண்டு.
  • நிறுமத்தின் உறுப்பினராக பகராள் இருக்க வேண்டிய நியதி இல்லை.
  • பகராள் கூட்டத்தில் கலந்து கொள்ளலாமேயன்றி, அங்கு பேசும் உரிமை அவர்க்கில்லை.
  • வாக்குப்பதிவு நடைபெற்றாலொழிய,(Execpt on a pole) பகராளுக்கு வாக்கு செலுத்தும் உரிமையில்லை .
  • ஒன்றுக்கு மேற்பட்ட பகராள்களை ஒரு உறுப்பினர் தன் சார்பில் நியமிக்கலாம்.
  • பகராள் ஆணைப் படிவம் எழுத்து மூலம் இருக்க வேண்டும். நியமிப்பவர்
  • வருவாய்த்தலை (Revenue Stamp) ஒட்டிக் கையொப்பமிட்டிருக்க வேண்டும். கூட்டம் தொடங்கும் 48 மணி நேரத்திற்கு முன்னரே அலுவலகத்தில் அது சேர்ப்பிக்கப்பட வேண்டும்.

ஆ. குறைவெண் (Quorum)

ஏதேனும் பொருள் குறித்துச் செல்லத்தக்க வகையில் தீர்மானம் நிறைவேற்ற நடைபெறும் கூட்டத்தில் நேரிடையாகக் கலந்துகொள்ள வேண்டிய குறைந்தளவு உறுப்பினர் எண்ணிக்கையே இக்குறைவெண் (Quorum) எனுஞ்சொல் உணர்த்தும்.

நிறுமச் செயல்முறை விதிகள்(Articles of Association)

குறைவெண் என்ன என்பதைக் குறிப்பிடும். தனி வரையறு நிறுமமாயின், குறைந்தது இரு உறுப்பினர்களும், பொது வரையறு நிறுமமாயின் 5 உறுப்பினர்களும் நேரில் வந்து கூட்டத்தில் கலந்துகொள்ள வேண்டிய குறைவெண் ஆகும்.

அவைக் கூட்டத்தைப் (Board Meeting) பொருத்தவரை இயக்குநரவை உறுப்பினர்களில் மூன்றில் ஒன்றாகும். (பின்னம் வரின், அடுத்த எண்ணாக உயர்த்தப்படும்) அல்லது இரு இயக்குநர்கள், இதில் எது அதிகமோ அதுவே அவைக் கூட்டத்திலுள்ள குறைவெண் ஆகும். ஆயினும் செயல்முறை விதிகள் இதனினும் கூடுதலான எண்ணைக் குறிப்பிடலாம்.

கூட்டத்தில் குறைவெண் எத்துணை பேர் வந்துள்ளனர் என்பதைக் கணக்கிட, பகராள் சேர்த்துக் கணக்கிடக் கூடாது. நேரிடையாக வந்திருக்கும் உறுப்பினர்களின் எண்ணிக்கையையே கருத்தில் கொள்ள வேண்டும்.

கூட்டம் தனது அலுவலை தொடங்கும் போது குறைவெண் இருந்தால் போதுமானதாகும். குறைவெண் அளவு உறுப்பினர்கள் கலந்துகொள்ளாத கூட்டத்தில் நிறைவேற்றப்படும் தீர்மானங்கள் செல்லத்தக்கவை அல்ல என்பதிலிருந்தே குறைவெண்ணின் முக்கியத்துவத்தை உணரலாம். குறைவெண் இல்லையெனில், கூட்டம் தள்ளிப்போடப்படும்.

இ. நிகழ்ச்சி நிரல் (Agenda)

கூட்டத்தில் மேற்கொள்ள வேண்டிய நடவடிக்கைகளின் வரிசையே நிகழ்ச்சி நிரல் என்று கூறப்படுகிறது. கூட்டத் தலைவருடன் கலந்துரையாடி, நிறுமச் செயலர் நிகழ்ச்சி நிரலைத் தயார் செய்கிறார்.

தீர்மானங்களும், நிகழ்ச்சிக் குறிப்புகளும் (Resolutions and meetings)

தீர்மானம் – பொருள் கூட்டத்தில் வைக்கப்படும் முன்மொழிகை(Proposal) நிறைவேற்றப்படுமாயின் அது தீர்மானம் (Resolution) ஆகிறது. ஆக பெரும்பான்மை உறுப்பினர்களின் முடிவைப் பிரதிபலிப்பது தீர்மானம் ஆகும்.

தீர்மான வகைகள் மூன்று வகைகளாகப் பிரிக்கலாம்.

1) சாதாரணத் தீர்மானம் (Ordinary resolution)

2) சிறப்புத் தீர்மானம் (Special resolution)

3) சிறப்பு அறிவிக்கை வேண்டிய தீர்மானம் (Resolution requiring Special Notice)

சாதாரண தீர்மானம்

சாதாரண பெரும்பான்மையுடன் நிறைவேற்றப்படக் கூடிய தீர்மானம் சாதாரணத் தீர்மானம் எனப்படுகிறது. சாதாரண பெரும்பான்மையானது, தீர்மானத்திற்கு ஆதரவாக குறைந்தது 51 விழுக்காடு வாக்குகள் இருப்பதைக் குறிக்கும்.

சாதாரணத் தீர்மானம் போதுமானது என்பதற்கான சில பொருட்கள்

அ. தணிக்கை செய்யப்பட்ட ஆண்டுக் கணக்குகளையும், இயக்குநர் அறிக்கை, தணிக்கையர் அறிக்கை ஆகியவற்றை ஒப்புக்கொள்ளுதல்.

ஆ. தணிக்கையர் நியமனம்

இ. பதவி விலகும் இயக்குநர்கள் இடத்தில் இயக்குநர்களை நியமித்தல்

ஈ. பங்காதாயம் விளம்பல் (Declaration)

உ. பங்குகளை வட்டத்தில் (Discount) வெளியிடல்

ஊ. காலக்கெடுவுக்கு முன்னரே இயக்குநர் ஒருவரை நீக்குதல்

எ. நீக்கப்பட்ட இயக்குநர்க்குப் பதிலாக வேறு ஒரு இயக்குநரை நியமித்தல்

சிறப்பு தீர்மானம்

  1. சிறப்புப் பொருள் குறித்து நிறைவேற்றப்பட வேண்டியது சிறப்பு தீர்மானம். நான்கில் மூன்று பங்கு உறுப்பினர்கள் ஆதரித்து இத்தகைய தீர்மானத்தை நிறைவேற்ற வேண்டும். அதாவது தீர்மானத்திற்கு ஆதரவாக விழுந்த வாக்குகள், அதற்கு எதிராக விழுந்தவையைவிட மூன்று மடங்கு அதிகமாக இருக்க வேண்டும்.
  2. கூட்டம் பற்றித் தெரிவிக்கும் அறிவிக்கையில், இத்தீர்மானம் சிறப்புத் தீர்மானமாக நிறைவேற்றப்படும் என்ற விருப்பத்தை வெளிப்படுத்தியிருக்க வேண்டும்.
  3. கூட்ட நாளுக்கு முன் குறைந்தது 21 நாட்களுக்கு முன்னர் அறிவிக்கை (notice) அனுப்பப்பட்டிருக்க வேண்டும்.

சிறப்புத் தீர்மானம் போடப்படும் சில பொருளினங்கள்

  1. அமைப்புமுறையேட்டின் நோக்கத் துணைப் பிரிவில்(Objects caluse) மாற்றம் செய்தல்
  2. ஒரு மாநிலத்திலிருந்து நிறுமத்தின் பதிவலகத்தை வேறொரு மாநிலத்திற்கு மாற்றுதல்
  3. நிறுமச் செயல்முறை விதிகளில் மாற்றம் செய்தல்
  4. பங்கு முதல் குறைப்பு
  5. தனது மேலாண்மையின் கீழுள்ள பிற நிறுமம் ஒன்றுக்குக் கடன் வழங்குதல்
  6. சில சூழ்நிலைகளில், முதலிலிருந்து வட்டி செலுத்தல் (Paying interest out of Capital)
  7. நிறுமம் தன் விருப்பக் கலைப்பு (Voluntary winding up)

சிறப்பு அறிவிக்கை (Special Notice) வேண்டும் தீர்மானங்கள்.

இவ்வகையான தீர்மானங்கள் தனிவகையானவை அல்ல. அது சாதாரணத் தீர்மானமாகவோ அல்லது சிறப்புத் தீர்மானமாகவோ இருக்கலாம். தான் திட்டமிட்டுள்ள தீர்மானத்தை நிறைவேற்ற விரும்புபவர் நிறுமத்திற்கு 14 நாட்களுக்கு முன்னராக சிறப்பு அறிவிக்கை தரவேண்டும். இத்தீர்மானம் கிடைத்தவுடன், கூட்ட நாளுக்குக் குறைந்தது 7 நாட்களுக்கு முன்னராவது நிறுமம் இத்தீர்மான அறிவிக்கையைத் தெரிவிக்க வேண்டும். இது சாத்தியமில்லையென்றால், இதனைச் செய்தித்தாள்களில் வெளியிடலாம். சிறப்பு அறிவிக்கை தேவைப்படும் தீர்மானங்கள்.

  1. பதவி விலகும் தணிக்கையருக்கு மாறாக வேறொரு தணிக்கையரை நியமித்தல்
  2. பதவி விலகும் தணிக்கையர் மீண்டும் நியமிக்கப்படக் கூடாதெனத் தீர்மானம் ஒன்றை நிறைவேற்றுதல்
  3. பதவிக் காலம் முடிவடையும் முன்னராகவே இயக்குநர் ஒருவரை நீக்குதல்
  4. நீக்கப்பட்ட இயக்குநர் பதவியில் வேறொரு இயக்குநரை நியமித்தல்

வாக்குச் செலுத்தலும் (voting) வாக்கெடுப்பும் (Poll)

வாக்குச் செலுத்துதல்

தீர்மான முன்மொழிவு (Motion) என்று சொல்லப்படும் திட்டமிடப்பட்டுள்ள தீர்மானத்திற்கு ஆதரவாகவோ எதிராகவோ ஒருவருடைய விருப்பத்தைத் தெரிவித்தல் வாக்குச் செலுத்தல் அல்லது வாக்குப்பதிவு எனப்படும். ஒரு நிறுமக் கூட்டத்தில் குரலொலியின் மூலம் (Acclamation of Voice) கையைத் தூக்குதல்(Show of Hands) அல்லது வாக்குப்பதிவு மூலம் வாக்கைச் செலுத்தலாம்.

குரலொலியின் மூலம் வாக்குச் செலுத்துதல்

தீர்மானத்திற்கு ஆதரவாக இருப்போர் முதலில் ஆம் என்று சொல்லக் கோரப்படுவர். பின்னர் அதற்கு எதிராக இருப்போர் இல்லை என்று குரல் எழுப்பக் கோரப்படுவர். பெரும்பான்மையோரின் குரல் ஒலி எதற்கு இருக்கிறதோ, அதனையொட்டித் தீர்மானம் நிறைவேறியதாக அல்லது தோற்றுவிட்டதாக அறிவிக்கப்பெறும்.

கையைத் தூக்குவது வழியே வாக்குச் செலுத்தல்

ஒரு தீர்மானத்திற்கு ஆதரவாக உள்ளோர் முதலில் கையைத் தூக்கச் சொல்லப்படுவர். கைகள் எண்ணப்படும். பின்னர் எதிராக உள்ளோரையும் இவ்வாறு செய்யச் சொல்லி, கைகளைக் கணக்கிட்டு, ஆதரவுக் கைகள் அதிகமிருப்பின் தீர்மானம் நிறைவேற்றப்பட்டதாகவும், எதிரான கைகள் கூடுதலாயிருப்பின், தீர்மானம் தோற்கடிக்கப்பட்டதாகவும் விளம்பப்படும். 3. வாக்கெடுப்பின் மூலம் வாக்கு செலுத்தல்

கையைத் தூக்குவது மூலம் வாக்கெடுப்பு நடத்தப்பெற்ற முறை உறுப்பினர்கட்கு மனநிறைவை அளிக்கவில்லையெனில், வாக்குப்பதிவு ஏற்பாடு செய்யுமாறு கோரலாம். இங்கு வாக்குச்சீட்டில், ஆதரவு அல்லது எதிராக என்று உறுப்பினர்கள் வாக்குப்பதிவு செய்கின்றனர். பதிவான வாக்குகளை எண்ணி, முடிவு அறிவிக்கப்படும். வாக்குப்பதிவில், நிறுமத்தின் செலுத்தப்பெற்ற பங்கு முதலில் உறுப்பினர் வைத்திருக்கும் பங்கு விகிதத்தில் அதாவது பங்குகள் எண்ணிக்கை அடிப்படையில் ஒருவரின் வாக்குரிமை கணக்கிடப்படும்.

கூட்டத் தலைவர் தானே முன்வந்தோ, அல்லது குறிப்பிட்ட (வருகை தந்துள்ள) உறுப்பினர்கள் (பகராள் உட்பட) கோரிக்கை விடின், வாக்குப் பதிவிற்கு ஏற்பாடு செய்யப்படும். வாக்குப்பதிவில், பகராளுக்கு (Proxy) வாக்கு செலுத்தும் உரிமை உண்டு.

நிகழ்ச்சிக் குறிப்பு (Minutes)

நிறுமமொன்றின் பல்வகையான கூட்டங்கள் ஒவ்வொன்றிலும் எடுக்கப்பெற்ற முடிவுகளின் (தீர்மானங்களின்) உண்மையான, சரியான பதிவுகள்தான் நிகழ்ச்சிக் குறிப்பு எனப்படுகிறது. பொது மற்றும் இயக்குநரவைக் கூட்டங்களின் அனைத்து நடைமுறைகளின் சுருக்கத்தினை உள்ளடக்கிய நிகழ்ச்சிக் குறிப்பேட்டினை ஒவ்வொரு நிறுமமும் வைத்திருக்க வேண்டும். நிகழ்ச்சிக் குறிப்பு சுருக்கமாகவும் உண்மையானதாகவும் இருக்க வேண்டும். பொருள் வேறுபாட்டுக்கு இடங்கொடா வண்ணம் அது சரியானதாக எழுதப்பட்டிருக்க வேண்டும். வருணனை வார்த்தைகளற்றதாகவும் இருக்க வேண்டும்.

நிகழ்ச்சிக் குறிப்பேட்டில் காணப்பெற வேண்டியவை.

  1. கூட்டத்தின் தன்மை. ஆண்டுப் பொதுக் கூட்டமோ, சிறப்புப் பொதுக்கூட்டமோ, (இயக்குநர்) அவைக் கூட்டமோ என்ற விவரம்.
  2. கூட்ட நாள், காலம், இடம் பற்றிய விவரம்.
  3. கூட்டத் தலைவர், இயக்குநர்கள், செயலர் ஆகியோர் பெயர்களும், வந்திருந்த உறுப்பினர்தம் எண்ணிக்கையும்.
  4. நிகழ்ச்சி நிரலில் குறிப்பிட்ட வரிசையில், நடைபெற்ற நிகழ்ச்சிகளின் சுருக்கம்.
  5. கடந்த கூட்டத்தின் நிகழ்ச்சிக் குறிப்புக்கு இக்கூட்டத்தின் ஒப்புதல்
  6. கூட்டத்தில் நிறைவேற்றப்பட்ட தீர்மானங்கள்
  7. கூட்டத் தலைவரின் கையொப்பம் (நாளுடன்)

ஆதாரம் : தமிழ்நாடு ஆசிரியர் கல்வியியல் ஆராய்ச்சி மையம்

Filed under:
3.0
கருத்தைச் சேர்

(மேற்கண்ட தகவலில் உங்களுக்கு ஏதாவது கருத்துக்கள்/ஆலோசனைகள் இருந்தால், இங்கே பதிவு செய்யவும்)

Enter the word
நெவிகடிஒன்
Back to top