<div id="MiddleColumn_internal"> <h3 style="text-align: justify; ">நோக்கம்</h3> <p style="text-align: justify; ">குறைந்த அளவு இருபது உறுப்பினர்களைக் கொண்டு கட்டமைக்கப்படும் குழு அடிப்படை அமைப்புக் குழுவாகும், இதில் பெண்களும் சமஅளவில் உறுப்பினர்களாக இடம் பெற வெண்டும்.</p> <p style="text-align: justify; ">குறைந்த அளவு ஐந்து பெண்களாவது இருத்தல் வேண்டும். இந்த அடிப்படை அமைப்புக் குழுவானது முகாம் என்று அழைக்கப்படும்.</p> <h3 style="text-align: justify; ">முகாம் பொதுக்குழு</h3> <ul> <li style="text-align: justify; "><span>முகாம் அளவிலான உயர்நிலை அதிகாரம் கொண்டதே முகாம் பொதுக்குழுவாகும். இப்பொதுக்குழு ஆண்டுக்கு ஒருமுறை முகாம் செயலாளர் தலைமையில் முகாமிற்கு அடுத்த மேலமைப்புச் செயலாளர் அல்லது அவர் சார்பில் ஒரு பொறுப்பாளர் முன்னிலையில் கூடும்.</span></li> <li style="text-align: justify; "><span>இடைப்பட்டக் காலங்களில் தேவையையெட்டி, முகாமிற்கு அடுத்த மேலமைப்புச் செயலாளரின் வழிகாட்டுதல் அல்லது ஒப்புதலின் அடிப்படையிலோ, முகாமின் உறுப்பினர்களில் மூன்றிலொரு பங்கினர் கையெழுத்திட்டுக் கேட்டுக் கொள்வதன் அடிப்படையிலோ சிறப்புப் பொதுக்குழுவைக் கூட்டலாம்.</span></li> <li style="text-align: justify; "><span>பொதுக்குழுவின் மொத்த உறுப்பினர்களில் மூன்றிலொரு பங்கினர் பங்கேற்க வேண்டும். இவ்வெண்ணிக்கைக்குக் குறைவாயிருப்பின், முகாமையான முடிவுகளை எடுக்கவோ, தீர்மானங்களை நிறைவேற்றவோ கூடாது.</span></li> <li style="text-align: justify; "><span>பொதுக்குழுவிற்கான இடம், நாள் மற்றும் நேரம் ஆகியவற்றைக் கூட்டம் நடத்துவதற்கு ஏழு நாட்களுக்கு முன்னதாக முகாம் செயலாளர் முகாம் உறுப்பினர்களுக்குத் தெரியப்படுத்த வேண்டும்.</span></li> </ul> <h3 style="text-align: justify; ">பொதுக்குழுவின் பணிகள்</h3> <ul> <li style="text-align: justify; "><span>முகாம் செயலாளர் முன்வைக்கும் ஆண்டறிக்கை மற்றும் நிதிச் செயலாளர் முன்வைக்கும் வரவு-செலவு அறிக்கை ஆகியவற்றைத் திறனாய்வு செய்து ஒப்புதல் அளித்தல்.</span></li> <li style="text-align: justify; "><span>முகாம் செயற்குழு முன் வைக்கும் ஆண்டுச் செயல் திட்டத்தை ஆய்வு செய்து ஒப்புதல் அளித்தல்.</span></li> <li style="text-align: justify; "><span>மூன்றாண்டுகளுக்கு ஒருமுறை முகாம் பொறுப்பாளர்களாக, முகாம் செயலாளர் ஒருவர், துணைச்செயலாளர்கள் இருவர் அல்லது மூவர், நிதிச்செயலாளர் ஒருவர் ஆகியோரையும், முகாம் செயற்குழு உறுப்பினர்கள் மற்றும் வட்டார அமைப்புக்கான செயற்குழு உறுப்பினர்கள் ஆகியோரையும் தெரிவு அல்லது தேர்வு செய்தல்.</span></li> <li style="text-align: justify; "><span>ஆண்டுக்கு ஒருமுறை கூடும் பொதுக்குழுவில் காலியாகவுள்ள இடங்களுக்கு பொறுப்பாளர்களை நிரப்புதல் அல்லது நிரப்பியதற்கு ஒப்புதல் அளித்தல்.</span></li> </ul> <h3 style="text-align: justify; ">பொதுக்குழுவில் இடம்பெறும் உறுப்பினர்கள்</h3> <ul> <li style="text-align: justify; "><span>முகாம் பொறுப்பாளர்கள்.</span></li> <li style="text-align: justify; "><span>முகாம் செயற்குழு உறுப்பினர்கள்.</span></li> <li style="text-align: justify; "><span>முகாமிலுள்ள அனைத்து உறுப்பினர்கள்.</span></li> <li style="text-align: justify; "><span>துணைநிலை அமைப்புகளின் முகாம் பொறுப்பாளர்கள்.</span></li> <li style="text-align: justify; "><span>முகாமிற்கு அடுத்த மேலமைப்புச் செயலாளரின் ஒப்புதல் பெற்ற சிறப்பு அழைப்பாளர்கள்.</span></li> </ul> <h3 style="text-align: justify; ">முகாம் செயற்குழு<span> </span></h3> <ul> <li style="text-align: justify; "><span>முகாமிற்கு அடுத்த மேலமைப்புகளின் வழிகாட்டுதல்கள், முகாம் பொதுக்குழுவின் முடிவுகள் ஆகியவற்றை நடைமுறைப்படுத்தவும், அவ்வப்போது முகாம் அளவில் எழும் அரசியல் சூழ்நிலைகளுக்கேற்ப முடிவுகளை மேற்கொள்ளவும், இயக்கத்தை வழிநடத்தவும், அதிகாரம் கொண்ட குழுவே முகாம் செயற்குழுவாகும்.</span></li> <li style="text-align: justify; "><span>இச்செயற்குழு திங்களுக்கொருமுறை முகாம் செயலாளரின் தலைமையில் கூடும். தேவையையொட்டி, மேலமைப்புச் செயலாளரின் அனுமதியோடு முகாம் செயலாளரோ அல்லது முகாம் செயற்குழு உறுப்பினர்களில் மூன்றில் ஒரு பங்கினர் கையெழுத்திட்டுக் கேட்டுக் கொள்வதன் அடிப்படையிலோ இடைப்பட்டக் காலங்களில் சிறப்பு முகாம் செயற்குழு கூட்டப்படும்.</span></li> </ul> <h3 style="text-align: justify; ">முகாம் செயற்குழுவின் பணிகள்<span> </span></h3> <ul> <li style="text-align: justify; "><span>மேலமைப்புகளின் வழிகாட்டுதல்கள், முகாம் பொதுக்குழுவின் முடிவுகள் அனைத்தையும் முகாம் செயற்குழு நடைமுறைப்படுத்தும்.</span></li> <li style="text-align: justify; "><span>இயக்கத்தின் முகாம் அளவிலான செயலறிக்கைகள், இயக்கத் தொடர்பான பிற அறிக்கைகள் மற்றும் செயல்திட்டங்கள் முதலியவற்றை திறனாய்வுக்கும், கலந்தாய்வுக்கும் ஒவ்வொரு முகாம் பொதுக்குழுவிலும், முகாம் செயற்குழு முன்வைக்கும்.</span></li> <li style="text-align: justify; "><span>அரசியல் சூழல்கள் மற்றும் இயக்கத் தொடர்பானச் சிக்கல்கள் குறித்து அவ்வப்போது கலந்தாய்வுகள் செய்யவும், முடிவுகள் எடுக்கவும், அம்முடிவுகளினபடிப்படையில் இயக்கத்தை வழிநடத்தவுமானப் பணிகள் முகாம் செயற்குழு செய்யும்.</span></li> </ul> <h3 style="text-align: justify; ">விதிகள்<span> </span></h3> <p style="text-align: justify; "><strong>அடிப்படை அமைப்புக் குழுவின் விதி 1</strong><span> </span></p> <ul> <li style="text-align: justify; "><span>தவிர்க்கமுடியாதக் காரணங்களால் முகாம் செயற்குழுக் கூட்டங்களில் கலந்து கொள்ள இயலாதவர்கள் அதற்கானத் தகவலை முகாம் செயற்குழுக் கூட்டத்திற்கு முன்னதாகவோ அல்லது கூட்டத்தின்போதோ முகாம் செயலாளருக்குத் தெரிவிக்க வேண்டும்.</span></li> <li style="text-align: justify; "><span>அல்லது கூட்டத்தில் கலந்து கொள்ள இயலாமைக்கான விளக்கத்தை முகாம் செயற்குழு கூட்டம் நடைபெற்ற ஏழு நாட்களுக்குள் முகாம் செயலாளரிடம் எழுத்தில் வழங்க வேண்டும்.</span></li> </ul> <p style="text-align: justify; "><strong>அடிப்படை அமைப்புக் குழுவின் விதி 2</strong></p> <ul> <li style="text-align: justify; "><span>முகாம் செயற்குழுக் கூட்டத்திற்குக் குறித்த நேரத்தில் பங்கேற்கத் தவறும் உறுப்பினர்கள் ஒழுங்கு நடவடிக்கைக்கு ஆளாவர்.</span></li> <li style="text-align: justify; "><span>முகாம் செயற்குழுக் கூட்டத்தில் தொடர்ந்து மூன்று முறை பங்கேற்காதவர்கள் முகாம் செயற்குழு உறுப்பினர் தகுதியைத் தானாகவே இழந்து விடுவர். அத்துடன் அவர்கள் ஒழுங்கு நடவடிக்கைக்கான நடைமுறைகளுக்கும் ஆளாவர்.</span></li> </ul> <p style="text-align: justify; "><strong>வட்டார அமைப்பின் விதி 3</strong></p> <ul> <li style="text-align: justify; "><span>முகாம் செயற்குழுவின் நடவடிக்கைகள் அனைத்தும் முறையாக நிகழ்க் குறிப்பேட்டில் பதிவு செய்யப்பட வேண்டும்.</span></li> <li style="text-align: justify; "><span>முகாம் செயற்குழுவில் பங்கேற்போர் கையொப்பமிடும் வருகைப் பதிவேட்டையும் செயற்குழு உறுப்பினர்கள் ஒப்படைக்கும் செயலறிக்கைகளுக்கான கோப்புகளையும் முகாம் செயற்குழுக் கையாள வேண்டும்.</span></li> </ul> <p style="text-align: justify; "><strong>அடிப்படை அமைப்புக் குழுவின் விதி 4</strong></p> <ul> <li style="text-align: justify; "><span>முகாம் செயற்குழு கூடும் ஒவ்வொரு முறையும், அதற்கு முன்னதாக நடைபெற்ற முகாம் செயற்குழுவின் நடவடிக்கைகள் மற்றும் முடிவுகள் குறித்தச் சுருக்க அறிக்கையினை முகாம் செயலாளர் முகாம் செயற்குழுவின் மீள்பார்வைக்கு முன்வைக்க வேண்டும்.</span></li> <li style="text-align: justify; "><span>முகாம் செயலாளர் உட்பட முகாம் செயற்குழுவின் உறுப்பினர்கள் அனைவரும், வழக்கமாகக் கூட்டப்படும் ஒவ்வொரு முகாம் செயற்குழுவிலும், முகாம் செயற்குழுவின் இரண்டு கூட்டங்களுக்கு இடைப்பட்டக் காலத்திற்குரியச் செயலறிக்கைகளையும், வரவு-செலவு அறிக்கைகளையும் முகாம் செயற்குழுவில் ஒப்படைக்க வேண்டும். தவறினால், ஒழுங்கு நடவடிக்கைக்கு ஆளாவர்.</span></li> <li style="text-align: justify; "><span>முகாம் அளவில் நடைபெறும் நிகழ்ச்சிகள் தொடர்பான புகைப்படங்கள், துண்டறிக்கைகள், ஒட்டிகள், ஒலி – ஒளி நாடாக்கள், செய்தி நறுக்குகள் மற்றும் வழக்குகள் தொடர்பான ஆவணங்கள் உள்ளிட்ட அனைத்தையும் முகாம் செயலாளர் வட்டார அமைப்புச் செயற்குழுவில் ஒப்படைக்க வேண்டும்.</span></li> <li style="text-align: justify; "><span>மேலமைப்புகளின் வழிகாட்டுதலின்படி, ஒருங்கிணைக்கப்படும் அரசியல் மற்றும் பண்பாட்டு நிகழ்ச்சிகள் மற்றும் பிற பொதுநிகழ்ச்சிகள் ஆகியவற்றுக்கான வரவு – செலவு அறிக்கைகளை தொடர்புடைய பொறுப்பாளர்கள் பதினைந்து நாட்களுக்குள் முகாம் செயலாளரிடம் ஒப்படைக்க வேண்டும்.</span></li> </ul> <p style="text-align: justify; "><strong>ஆதாரம் : </strong>தமிழ்நாடு சட்டமன்ற பேரவை</p> </div>