<div id="MiddleColumn_internal"> <h3><span>அறிமுகம்</span></h3> <p class="MsoNoSpacing" style="text-align:justify; "><span>சிறுநீரக</span><span> </span><span>மாற்று</span><span> </span><span>சிகிச்சை</span><span> </span><span>பெற்றவர்கள்</span><span> </span><span>மாற்று</span><span> </span><span>சிறுநீரக</span><span> </span><span>ஒவ்வாமையை</span><span> </span><span>தடுக்கும்</span><span> (Anti rejection) </span><span>மருந்துகளை</span><span> </span><span>எடுத்துக்</span><span> </span><span>கொள்வதால்</span><span> </span><span>பல்வேறு</span><span> </span><span>வகை</span><span> </span><span>நோய்க்</span><span> </span><span>கிருமிகளை</span><span> </span><span>எதிர்க்கும்</span><span> </span><span>சக்தி</span><span> </span><span>அவர்களுக்கு</span><span> </span><span>வெகுவாக</span><span> </span><span>குறைந்து</span><span> </span><span>விடுகின்றது</span><span>. </span><span>இதனால்</span><span> </span><span>இவர்களுக்கு</span><span> </span><span>சில</span><span> </span><span>வகை</span><span> </span><span>வைரஸ்</span><span> </span><span>கிருமிகளால்</span><span> </span><span>ஏற்படும்</span><span> </span><span>நோய்கள்</span><span> </span><span>வரலாம்</span><span>. </span><span>சில</span><span> </span><span>வகை</span><span> </span><span>வைரஸ்</span><span> </span><span>கிருமிகள்</span><span> </span><span>நம்</span><span> </span><span>அனைவருக்குமே</span><span> </span><span>வந்து</span><span> </span><span>குணமாகி</span><span> </span><span>விடுகின்றன</span><span>.</span></p> <p class="MsoNoSpacing" style="text-align:justify; "><span>இதில்</span><span> </span><span>சிலருக்கு</span><span> </span><span>அந்த</span><span> </span><span>வைரஸ்</span><span> </span><span>கிருமிகள்</span><span> </span><span>உடலிற்குள்ளேயே</span><span> </span><span>ஒளிந்து</span><span> </span><span>கொண்டிருக்கும்</span><span>. </span><span>சாதாரணமான</span><span> </span><span>ஆரோக்யம்</span><span> </span><span>உள்ளவர்களுக்கு</span><span> </span><span>இதனால்</span><span> </span><span>உடலிற்கு</span><span> </span><span>எந்த</span><span> </span><span>பிரச்சனையும்</span><span> </span><span>வருவதில்லை</span><span>.</span></p> <p class="MsoNoSpacing" style="text-align:justify; "><span>ஆனால்</span><span> </span><span>சிறுநீரக</span><span> </span><span>மாற்று</span><span> </span><span>சிகிச்சை</span><span> </span><span>பெற்ற</span><span> </span><span>சிலருக்கு</span><span> </span><span>உடலின்</span><span> </span><span>நோய்</span><span> </span><span>எதிர்ப்பு</span><span> </span><span>சக்தி</span><span> </span><span>குறைந்துள்ளதால்</span><span> </span><span>மறைந்திருந்த</span><span> </span><span>இந்த</span><span> </span><span>வைரஸ்</span><span> </span><span>கிருமிகள்</span><span> </span><span>மீண்டும்</span><span> </span><span>தலை</span><span> </span><span>தூக்கி</span><span> </span><span>நோயாக</span><span> </span><span>மாற</span><span> </span><span>அதிக</span><span> </span><span>வாய்ப்பு</span><span> </span><span>உள்ளது</span><span>.</span></p> <h3 class="MsoNoSpacing" style="text-align: justify; "><span>வைரஸ்</span><span> </span><span>கிருமிகள்</span></h3> <ol> <li style="text-align: justify; "><span>சைடோமெகலோ</span><span> </span><span>வைரஸ்</span><span> (Cytomegalo Virus – Cmv)</span></li> <li style="text-align: justify; "><span>எப்ஸ்டீன்</span><span> </span><span>பார்</span><span> </span><span>வைரஸ்</span><span> (Ebstein – Barr virus)</span></li> <li style="text-align: justify; "><span>ஹெர்பிஸ்</span><span> </span><span>சிம்ப்ளெக்ஸ்</span><span> </span><span>வைரஸ்</span><span> (Hopes Simplex virus)</span></li> <li style="text-align: justify; "><span>ஹெர்பிஸ்</span><span> </span><span>ஜாஸ்டர்</span><span> </span><span>வைரஸ்</span><span> (Herpes Zoster Virus)</span></li> <li style="text-align: justify; "><span>பாபில்லோமா</span><span> </span><span>வைரஸ்</span><span> (Papilloma Virus)</span></li> <li style="text-align: justify; "><span>BK </span><span>வைரஸ்</span><span> (BK Virus)</span></li> </ol> <p class="MsoNoSpacing" style="text-align:justify; "><span>இவை</span><span> </span><span>பெரும்பாலான</span><span> </span><span>சமயங்களில்</span><span> </span><span>எளிதில்</span><span> </span><span>குணப்படுத்தக்</span><span> </span><span>கூடியவை</span><span>. </span><span>ஆனால்</span><span> </span><span>ஆரம்பத்திலேயே</span><span> </span><span>சரியாக</span><span> </span><span>கண்டறிந்து</span><span> </span><span>சிகிச்சை</span><span> </span><span>செய்ய</span><span> </span><span>வேண்டும்</span><span>.</span></p> <p class="MsoNoSpacing" style="text-align:justify; "><strong><span>சைடோமெகலோ</span><span> </span><span>வைரஸ்</span><span> (Cytomegalo Virus – CMV)</span></strong></p> <p class="MsoNoSpacing" style="text-align:justify; "><span>சிறுநீரக</span><span> </span><span>மாற்று</span><span> </span><span>சிகிச்சை</span><span> </span><span>செய்து</span><span> </span><span>கொண்டவர்களுக்கு</span><span> CMV </span><span>என</span><span> </span><span>சுருக்கமாக</span><span> </span><span>அழைக்கப்படும்</span><span> </span><span>இந்த</span><span> </span><span>வைரஸ்</span><span> </span><span>கிருமித்</span><span> </span><span>தாக்கம்</span><span> </span><span>மிக</span><span> </span><span>முக்கியமானது</span><span>.</span></p> <p class="MsoNoSpacing" style="text-align:justify; "><span>இந்தியாவில்</span><span> </span><span>அநேகமாக</span><span> </span><span>நாம்</span><span> </span><span>அனைவருமே</span><span> </span><span>சிறுவயதிலேயே</span><span> </span><span>இந்த</span><span> </span><span>வைரஸ்</span><span> </span><span>கிருமியினால்</span><span> </span><span>ஃப்ளு</span><span> </span><span>காய்ச்சல்</span><span> </span><span>போன்ற</span><span> </span><span>பாதிப்பு</span><span> </span><span>ஏற்பட்டு</span><span> </span><span>அதிலிருந்து</span><span> </span><span>குணமடைந்திருப்போம்</span><span>. </span><span>இந்த</span><span> CMV </span><span>வைரஸ்</span><span> </span><span>கிருமியினால்தான்</span><span> </span><span>காய்ச்சல்</span><span> </span><span>வந்தது</span><span> </span><span>என்பது</span><span> </span><span>தெரியாமலேயே</span><span> </span><span>பாதிப்பு</span><span> </span><span>சரியாகி</span><span> </span><span>இருக்கும்</span><span>. </span><span>அதே</span><span> </span><span>சமயம்</span><span> </span><span>இந்த</span><span> </span><span>கிருமித்</span><span> </span><span>தாக்கம்</span><span> </span><span>வந்த</span><span> </span><span>சிலருக்கு</span><span> </span><span>இந்த</span><span> </span><span>வைரஸ்</span><span> </span><span>உடலினுள்ளே</span><span> </span><span>பதுங்கி</span><span> </span><span>விடுகின்றது</span><span>. </span><span>இதனால்</span><span> </span><span>உடல்</span><span> </span><span>ஆரோக்யத்திற்கும்</span><span> </span><span>எந்த</span><span> </span><span>பங்கமும்</span><span> </span><span>வருவதில்லை</span><span>. </span><span>சிறுநீரக</span><span> </span><span>மாற்று</span><span> </span><span>சிகிச்சை</span><span> </span><span>பெற்ற</span><span> </span><span>சிலருக்கு</span><span> </span><span>சிறுநீரக</span><span> </span><span>மாற்று</span><span> </span><span>மருந்துகளால்</span><span> </span><span>இந்த</span><span> </span><span>உடலிற்குள்</span><span> </span><span>பதுங்கி</span><span> </span><span>தூங்கிக்</span><span> </span><span>கொண்டிருந்த</span><span> </span><span>சைடோமெகலோ</span><span> </span><span>வைரஸ்</span><span> </span><span>மீண்டும்</span><span> </span><span>உயிர்த்தெழுந்து</span><span> </span><span>வீரியம்</span><span> </span><span>பெற்று</span><span> </span><span>உடலின்</span><span> </span><span>பல</span><span> </span><span>பாகங்களுக்கும்</span><span> </span><span>பரவி</span><span> </span><span>நோயாக</span><span> </span><span>மாற</span><span> </span><span>அதிக</span><span> </span><span>வாய்ப்பு</span><span> </span><span>உள்ளது</span><span>.</span></p> <p class="MsoNoSpacing" style="text-align:justify; "><span>சைடோமெகலோ</span><span> </span><span>வைரஸ்</span><span> </span><span>உடலின்</span><span> </span><span>எந்த</span><span> </span><span>பாகத்தையும்</span><span> </span><span>பாதிக்கலாம்</span><span>. </span><span>என்றாலும்</span><span> </span><span>மாற்றுச்</span><span> </span><span>சிறுநீரகம்</span><span>, </span><span>ஈரல்</span><span>, </span><span>கண்</span><span>, </span><span>இரைப்பை</span><span>, </span><span>குடல்</span><span>, </span><span>நுரையீரல்</span><span>, </span><span>இரத்த</span><span> </span><span>அணுக்கள்</span><span> </span><span>ஆகியவற்றை</span><span> </span><span>இது</span><span> </span><span>முக்கியமாக</span><span> </span><span>பாதிக்கலாம்</span><span>.</span></p> <p class="MsoNoSpacing" style="text-align:justify; "><span>சிறுநீரக</span><span> </span><span>மாற்று</span><span> </span><span>மருந்துகள்</span><span> </span><span>எடுத்துக்</span><span> </span><span>கொள்பவர்கள்</span><span>, </span><span>வேறு</span><span> </span><span>காரணங்களுக்காக</span><span> </span><span>நோய்</span><span> </span><span>எதிர்ப்பு</span><span> </span><span>சக்தியை</span><span> </span><span>குறைக்கும்</span><span> </span><span>மருந்துகள்</span><span> </span><span>எடுத்துக்</span><span> </span><span>கொள்பவர்கள்</span><span> (</span><span>உதாரணம்</span><span> - </span><span>புற்று</span><span> </span><span>நோய்க்கு</span><span> </span><span>மருந்துகள்</span><span> </span><span>எடுத்துக்</span><span> </span><span>கொள்பவர்கள்</span><span>) </span><span>ஆகியவர்களுக்கு</span><span> </span><span>இந்த</span><span> </span><span>கிருமி</span><span> </span><span>நோயாக</span><span> </span><span>மாறும்</span><span> </span><span>அபாயம்</span><span> </span><span>உள்ளது</span><span>. </span><span>இந்த</span><span> </span><span>கிருமியின்</span><span> </span><span>தாக்கம்</span><span> </span><span>லேசானதாகவும்</span><span>, </span><span>கடுமையானதாகவும்</span><span> </span><span>இருக்கலாம்</span><span>. </span><span>பல</span><span> </span><span>உறுப்புகளின்</span><span> </span><span>பாதிப்பாக</span><span> </span><span>வெளிப்படலாம்</span><span>. </span><span>காய்ச்சல்</span><span>, </span><span>இரத்த</span><span> </span><span>அணுக்கள்</span><span> </span><span>குறைவு</span><span>, </span><span>அதனால்</span><span> </span><span>இரத்தக்</span><span> </span><span>கசிவு</span><span>, </span><span>குடல்</span><span> </span><span>புண்</span><span>, </span><span>வயிற்று</span><span> </span><span>வலி</span><span>, </span><span>மலத்தில்</span><span> </span><span>இரத்தம்</span><span> </span><span>வெளியேறுதல்</span><span>, </span><span>இருமல்</span><span>, </span><span>சளி</span><span>, </span><span>கண்</span><span> </span><span>பார்வை</span><span> </span><span>பாதிப்பு</span><span> </span><span>என</span><span> </span><span>பல</span><span> </span><span>வகை</span><span> </span><span>தொந்திரவுகள்</span><span> </span><span>வரலாம்</span><span>.</span></p> <p class="MsoNoSpacing" style="text-align:justify; "><span>சில</span><span> </span><span>சமயம்</span><span> </span><span>இந்த</span><span> </span><span>கிருமி</span><span> </span><span>மாற்று</span><span> </span><span>சிறுநீரகத்தையும்</span><span> </span><span>பாதிக்கும்</span><span>. </span><span>அதனால்</span><span> </span><span>இரத்தத்தில்</span><span> </span><span>கிரியேட்டினின்</span><span> </span><span>அதிகரிக்கும்</span><span>. </span><span>அது</span><span> </span><span>கிருமி</span><span> </span><span>பாதிப்பதனாலா</span><span>? </span><span>மாற்று</span><span> </span><span>சிறுநீரக</span><span> </span><span>ஒவ்வாமையா</span><span>? (</span><span>ரிஜக்ஷன்</span><span> - Rejection) </span><span>என்ற</span><span> </span><span>குழப்பங்கள்</span><span> </span><span>வரலாம்</span><span>.</span></p> <h3><span>தடுக்கும் முறைகள்</span></h3> <p class="MsoNoSpacing" style="text-align:justify; "><span>சிறுநீரக</span><span> </span><span>மாற்று</span><span> </span><span>சிகிச்சைக்கு</span><span> </span><span>முன்பு</span><span> </span><span>சிறுநீரகம்</span><span> </span><span>கொடுப்பவரின்</span><span> </span><span>இரத்தமும்</span><span> </span><span>தானம்</span><span> </span><span>பெறுபவரின்</span><span> </span><span>இரத்தமும்</span><span> </span><span>அவருக்கு</span><span> </span><span>முன்பே</span><span> </span><span>சைடோமெகலோ</span><span> </span><span>வைரஸ்</span><span> </span><span>தாக்கம்</span><span> </span><span>வந்துள்ளதா</span><span>? </span><span>என்பதை</span><span> </span><span>அறியும்</span><span> </span><span>பரிசோதனைக்கு</span><span> </span><span>ஆட்படுத்தப்படம்</span><span> </span><span>அப்போது</span><span> </span><span>சிறுநீரக</span><span> </span><span>மாற்று</span><span> </span><span>பெறுபவர்களுக்கு</span><span> </span><span>முன்பே</span><span> </span><span>இந்த</span><span> </span><span>கிருமித்</span><span> </span><span>தாக்கம்</span><span> </span><span>வராமல்</span><span> </span><span>இருந்தால்</span><span> </span><span>கான்சைக்ளோவீர்</span><span> (Gancyclovir) </span><span>போன்ற</span><span> </span><span>மருந்துகள்</span><span> </span><span>குறிப்பிட்ட</span><span> </span><span>காலம்</span><span> </span><span>வரை</span><span> </span><span>கொடுப்பதன்</span><span> </span><span>மூலம்</span><span> CMV </span><span>வைரஸ்</span><span> </span><span>தாக்கத்தை</span><span> </span><span>குறைக்கலாம்</span><span>. </span><span>ஆனால்</span><span> </span><span>இந்தியாவில்</span><span> </span><span>பெரும்பாலானவர்களுக்கு</span><span> </span><span>இந்த</span><span> </span><span>கிருமி</span><span> </span><span>சிறு</span><span> </span><span>வயதிலேயே</span><span> </span><span>வந்திருக்கும்</span><span> </span><span>என்பதால்</span><span> </span><span>பெரும்பாலான</span><span> </span><span>சிறுநீரக</span><span> </span><span>மாற்று</span><span> </span><span>நோயாளிகளுக்கு</span><span> </span><span>இந்த</span><span> </span><span>திட்டம்</span><span> </span><span>பொருந்துவதில்லை</span><span>.</span></p> <h3 class="MsoNoSpacing" style="text-align: justify; "><span> </span><span>சிகிச்சை</span><span> </span><span>செய்யும் முறை</span></h3> <p class="MsoNoSpacing" style="text-align:justify; "><span>சிறுநீரக</span><span> </span><span>மாற்று</span><span> </span><span>சிகிச்சை</span><span> </span><span>செய்து</span><span> </span><span>கொண்ட</span><span> </span><span>எவருக்கும்</span><span> </span><span>மேற்கூரிய</span><span> </span><span>தொந்திரவுகளான</span><span> </span><span>காய்ச்சல்</span><span>, </span><span>இருமல்</span><span>, </span><span>இரத்த</span><span> </span><span>அணுக்கள்</span><span> </span><span>குறைவு</span><span> , </span><span>கிரியேட்டினின்</span><span> </span><span>அதிகரித்தல்</span><span> </span><span>ஆகியன</span><span> </span><span>இருந்தால்</span><span> </span><span>சிறுநீரக</span><span> </span><span>மருத்துவர்</span><span> </span><span>அவருக்கு</span><span> CMV </span><span>வைரஸ்</span><span> </span><span>கிருமித்</span><span> </span><span>தாக்கம்</span><span> </span><span>இருப்பதாக</span><span> </span><span>சந்தேகிக்கலாம்</span><span>. </span><span>அப்போது</span><span> </span><span>இரத்த</span><span> </span><span>அணுக்களின்</span><span> </span><span>முழு</span><span> </span><span>எண்ணிக்கை</span><span> (complete Blood Count – CBC) , </span><span>மாற்று</span><span> </span><span>சிறுநீரகத்திற்கான</span><span> </span><span>அல்ட்ராசவுண்ட்</span><span> </span><span>ஸ்கான்</span><span>, </span><span>இரத்தத்தில்</span><span> </span><span>கிரியேட்டினின்</span><span> </span><span>அளவு</span><span> </span><span>ஆகிய</span><span> </span><span>அடிப்படை</span><span> </span><span>பரிசோதனைகளைச்</span><span> </span><span>செய்யச்</span><span> </span><span>சொல்வார்</span><span>. </span><span>அத்தோடு</span><span> CMV </span><span>வைரஸ்</span><span> </span><span>கிருமி</span><span> </span><span>உள்ளதா</span><span> </span><span>என்பதை</span><span> </span><span>அறிய</span><span> </span><span>உதவும்</span><span> </span><span>சில</span><span> </span><span>சிறப்பு</span><span> </span><span>பரிசோதனைகளும்</span><span> </span><span>செய்யப்படும்</span><span>. </span><span>அவை</span><span> CMV </span><span>வைரஸ்</span><span> </span><span>கிருமியின்</span><span> </span><span>எதிர்</span><span> </span><span>உயிர்ச்சத்தான</span><span> CMV IgM </span><span>ஆன்டிபாடி</span><span>, CMV </span><span>வைரஸ்</span><span> </span><span>கிருமியையே</span><span> </span><span>நேரடியாக</span><span> </span><span>இரத்தம்</span><span> </span><span>மற்றும்</span><span> </span><span>உடல்</span><span> </span><span>திரவங்களில்</span><span> </span><span>கண்டுபிடிக்க</span><span> </span><span>உதவும்</span><span> CMV PCR </span><span>பரிசோதனை</span><span> </span><span>ஆகியன</span><span>. </span><span>இப்பரிசோதனைகளில்</span><span> CMV </span><span>வைரஸ்</span><span> </span><span>இருப்பதாக</span><span> </span><span>உறுதி</span><span> </span><span>செய்யப்பட்டால்</span><span> </span><span>இந்த</span><span> </span><span>கிருமிக்குண்டான</span><span> </span><span>கான்சைக்ளோவிர்</span><span>, </span><span>வால்கான்சைக்ளோவிர்</span><span> </span><span>என்ற</span><span> </span><span>மருந்துகள்</span><span> </span><span>மாத்திரைகளாகவோ</span><span> </span><span>அல்லது</span><span> </span><span>ஊசி</span><span> </span><span>மருந்தாகவோ</span><span> </span><span>குறிப்பிட்ட</span><span> </span><span>காலம்</span><span> </span><span>வரை</span><span> </span><span>கொடுக்கப்படும்</span><span>. </span><span>பொதுவாக</span><span> CMV </span><span>கிருமி</span><span> </span><span>இந்த</span><span> </span><span>மருந்துகளுக்கு</span><span> </span><span>நன்கு</span><span> </span><span>கட்டுப்படும்</span><span> </span><span>நீங்கள்</span><span> </span><span>பூரண</span><span> </span><span>குணமடையலாம்</span><span>.</span></p> <h3 class="MsoNoSpacing" style="text-align: justify; "><span>வைரஸ்</span><span> </span><span>கிருமி</span><span> </span><span>பாதிப்புகளை பாதிப்புகள்</span></h3> <p class="MsoNoSpacing" style="text-align:justify; "><strong><span>எப்ஸ்டீன்</span><span> </span><span>பார்</span><span> </span><span>வைரஸ்</span><span> (Ebstein – Barr Virus)</span></strong></p> <p class="MsoNoSpacing" style="text-align:justify; "><span>இந்த</span><span> </span><span>வைரஸ்</span><span> </span><span>கிருமியினால்</span><span> </span><span>வரும்</span><span> </span><span>பாதிப்பு</span><span> </span><span>நீண்ட</span><span> </span><span>நாள்</span><span> </span><span>காய்ச்சல்</span><span>, </span><span>அக்குள்</span><span>, </span><span>தொடை</span><span> </span><span>போன்ற</span><span> </span><span>பகுதிகளில்</span><span> </span><span>உள்ள</span><span> </span><span>நிணநீர்க்</span><span> </span><span>கட்டிகள்</span><span> (Lymph Nodes) </span><span>வீங்குதல்</span><span> (</span><span>நெறிகட்டுதல்</span><span>) </span><span>போன்ற</span><span> </span><span>தொந்திரவுகளாக</span><span> </span><span>வெளிப்படலாம்</span><span>. </span><span>அபூர்வமாக</span><span> </span><span>தோலைப்</span><span> </span><span>பாதிக்கும்</span><span> </span><span>ஒரு</span><span> </span><span>வகை</span><span>. </span><span>அபூர்வ</span><span> </span><span>புற்று</span><span> </span><span>நோய்க்கு</span><span> </span><span>இந்த</span><span> </span><span>கிருமி</span><span> </span><span>காரணமாக</span><span> </span><span>இருக்கலாம்</span><span>, </span><span>இந்த</span><span> </span><span>கிருமியை</span><span> </span><span>சில</span><span> </span><span>சிறப்பு</span><span> </span><span>இரத்த</span><span> </span><span>பரிசோதனைகள்</span><span> </span><span>மூலம்</span><span> </span><span>மட்டுமே</span><span> </span><span>அறிய</span><span> </span><span>முடியும்</span><span>. </span><span>இந்த</span><span> </span><span>வைரஸ்</span><span> </span><span>கிருமி</span><span> </span><span>பாதிப்பு</span><span> </span><span>வந்தால்</span><span> </span><span>அதற்குண்டான</span><span> </span><span>வைரஸ்</span><span> </span><span>கிருமி</span><span> </span><span>மருந்துகளுடன்</span><span> </span><span>சிறுநீரக</span><span> </span><span>மாற்று</span><span> </span><span>மருந்துகளின்</span><span> </span><span>அளவைக்</span><span> </span><span>குறைப்பதன்</span><span> </span><span>மூலமே</span><span> </span><span>சரி</span><span> </span><span>செய்ய</span><span> </span><span>முடியம்</span><span>.</span></p> <p class="MsoNoSpacing" style="text-align:justify; "><strong><span>ஹெர்பிஸ்</span><span> </span><span>சிம்ப்ளெக்ஸ்</span><span> </span><span>வைரஸ்</span><span> (Herpes Simplex Virus – HSV)</span></strong></p> <p class="MsoNoSpacing" style="text-align:justify; "><span>இந்த</span><span> </span><span>கிருமியும்</span><span> </span><span>உடலில்</span><span> </span><span>மறைந்து</span><span> </span><span>கொண்டிருக்கும்</span><span>. </span><span>உடலின்</span><span> </span><span>எதிர்ப்பு</span><span> </span><span>சக்தி</span><span> </span><span>மிகவும்</span><span> </span><span>குறைவாகும்</span><span> </span><span>போது</span><span> </span><span>தலை</span><span> </span><span>தூக்கி</span><span> </span><span>நரம்புகளின்</span><span> </span><span>வழியாக</span><span> </span><span>வெளியே</span><span> </span><span>வருகின்றது</span><span>. </span><span>வந்து</span><span> </span><span>வாய்ப்புண்</span><span>, </span><span>ஜனன</span><span> </span><span>உறுப்புகளின்</span><span> </span><span>தோலில்</span><span> </span><span>நீர்க்</span><span> </span><span>கொப்புளங்களாக</span><span> </span><span>இது</span><span> </span><span>வெளிப்படலாம்</span><span>. </span><span>அதோடு</span><span> </span><span>தோலில்</span><span> </span><span>வலி</span><span> </span><span>எரிச்சல்</span><span> </span><span>இருக்கலாம்</span><span>. </span><span>இந்த</span><span> </span><span>பாதிப்பை</span><span> </span><span>அசைக்ளோவிர்</span><span> (Acyclovir) </span><span>என்ற</span><span> </span><span>மருந்தை</span><span> </span><span>மாத்திரைகளாகவோ</span><span> </span><span>தோலுக்கு</span><span> </span><span>கிரீமாகவோ</span><span> </span><span>உபயோகிப்பதன்</span><span> </span><span>மூலம்</span><span> </span><span>எளிதில்</span><span> </span><span>குணப்படுத்தலாம்</span><span>.</span></p> <p class="MsoNoSpacing" style="text-align:justify; "><strong><span>ஹெர்பிஸ்</span><span> </span><span>ஜாஸ்டர்</span><span> </span><span>வைரஸ்</span><span> (Herpes Zoster Virus – HZV)</span></strong></p> <p class="MsoNoSpacing" style="text-align:justify; "><span>இந்த</span><span> </span><span>வைரம்</span><span> </span><span>கிருமியும்</span><span> </span><span>மேற்கூரிய</span><span> </span><span>ஹெர்பிஸ்</span><span> </span><span>வைரஸ்</span><span> </span><span>போல</span><span> </span><span>உடலில்</span><span> </span><span>நரம்பு</span><span> </span><span>மண்டலத்தில்</span><span> </span><span>மறைந்திருக்கும்</span><span>. </span><span>எதிர்ப்பு</span><span> </span><span>சக்தி</span><span> </span><span>குறைந்த</span><span> </span><span>சமயங்களில்</span><span> </span><span>வெளிவரும்</span><span>. </span><span>ஊடலின்</span><span> </span><span>எந்த</span><span> </span><span>பகுதியில்</span><span> </span><span>வேண்டுமானாலும்</span><span> (</span><span>அதிகமாக</span><span> </span><span>மார்பு</span><span>, </span><span>வயிற்றுப்</span><span> </span><span>பகுதியில்</span><span>) </span><span>கொப்புளங்களாக</span><span> </span><span>வெளிப்படும்</span><span>. </span><span>அதனோடு</span><span> </span><span>அதீத</span><span> </span><span>எரிச்சலான</span><span> </span><span>வலி</span><span> </span><span>இருக்கலாம்</span><span>. </span><span>இந்த</span><span> </span><span>கிருமியும்</span><span> </span><span>பெரும்பாலும்</span><span> </span><span>அசைக்ளோவிர்</span><span> </span><span>மருந்திற்குக்</span><span> </span><span>கட்டுப்படும்</span><span>. </span><span>ஆனால்</span><span> </span><span>சில</span><span> </span><span>சமயம்</span><span> </span><span>சிறுநீரக</span><span> </span><span>மாற்றுப்</span><span> </span><span>பெற்றவர்களுக்கு</span><span> </span><span>தோல்</span><span> </span><span>மட்டுமல்லாமல்</span><span> </span><span>பரவி</span><span> </span><span>மூளை</span><span>, </span><span>நுரையீரல்</span><span> </span><span>போன்ற</span><span> </span><span>முக்கிய</span><span> </span><span>உறுப்புகளையும்</span><span> </span><span>கடுமையாக</span><span> </span><span>பாதிக்கலாம்</span><span>. </span><span>இதை</span><span> </span><span>தோல்</span><span> </span><span>பரிசோதனை</span><span> </span><span>மற்றும்</span><span> </span><span>சில</span><span> </span><span>சிறப்பு</span><span> </span><span>பரிசோதனைகள்</span><span> </span><span>மூலம்</span><span> </span><span>தெளிவாக</span><span> </span><span>அறியலாம்</span><span>. </span><span>இதற்கும்</span><span> </span><span>அசைக்ளோவிர்</span><span> </span><span>மருந்தை</span><span> </span><span>மாத்திரைகளாகவோ</span><span> </span><span>அல்லது</span><span> </span><span>ஊசி</span><span> </span><span>மருந்தாகவோ</span><span> </span><span>கொடுத்து</span><span> </span><span>சரி</span><span> </span><span>செய்யலாம்</span><span>.</span></p> <p class="MsoNoSpacing" style="text-align:justify; "><strong><span>பாப்பில்லோமா</span><span> </span><span>வைரஸ்</span><span> (Papilloma Virus)</span></strong></p> <p class="MsoNoSpacing" style="text-align:justify; "><span>இந்த</span><span> </span><span>கிருமி</span><span> </span><span>தோலில்</span><span> </span><span>மருகு</span><span> </span><span>எனப்படும்</span><span> </span><span>கட்டிகளுக்கு</span><span> </span><span>காரணமாகும்</span><span>. </span><span>ஆரோக்யமானவர்களுக்கும்</span><span> </span><span>இது</span><span> </span><span>வரலாம்</span><span> </span><span>என்றாலும்</span><span> </span><span>சிறுநீரக</span><span> </span><span>மாற்று</span><span> </span><span>பெற்றவர்களுக்கு</span><span> </span><span>வந்தால்</span><span> </span><span>அதிக</span><span> </span><span>அளவிலும்</span><span> </span><span>வேகமாக</span><span> </span><span>பல</span><span> </span><span>இடங்களில்</span><span> </span><span>பரவவும்</span><span> </span><span>வாய்ப்புகள்</span><span> </span><span>அதிகம்</span><span>. </span><span>இதை</span><span> </span><span>ஆரம்பத்திலேயே</span><span> </span><span>க்ரையோதெரபி</span><span> (Cryotherapy) </span><span>என்ற</span><span> </span><span>சிறப்பு</span><span> </span><span>சிகிச்சையை</span><span> </span><span>தோல்</span><span> </span><span>மருத்துவர்</span><span> </span><span>மூலம்</span><span> </span><span>செய்து</span><span> </span><span>கொண்டால்</span><span> </span><span>பரவாமல்</span><span> </span><span>குணப்படுத்திக்</span><span> </span><span>கொள்ளலாம்</span><span>.</span></p> <p class="MsoNoSpacing" style="text-align:justify; "><strong><span>BK </span><span>வைரஸ்</span><span> (BK Virus)</span></strong></p> <p class="MsoNoSpacing" style="text-align:justify; "><span>இந்த</span><span> </span><span>வைரஸ்</span><span> </span><span>மாற்று</span><span> </span><span>சிறுநீரகத்தையும்</span><span> </span><span>அதன்</span><span> </span><span>சிறுநீர்க்</span><span> </span><span>குழாய்களையும்</span><span> </span><span>பாதிக்கின்றது</span><span>. </span><span>சிறுநீரில்</span><span> </span><span>இரத்தம்</span><span>, </span><span>காரணம்</span><span> </span><span>தெரியாத</span><span> </span><span>மாற்று</span><span> </span><span>சிறுநீரக</span><span> </span><span>செயலிழப்பு</span><span> </span><span>என</span><span> </span><span>இந்த</span><span> </span><span>பாதிப்பு</span><span> </span><span>வெளிப்படலாம்</span><span>. </span><span>இந்த</span><span> </span><span>கிருமி</span><span> </span><span>இருப்பதாக</span><span> </span><span>சந்தேகித்தால்</span><span> </span><span>ஒரு</span><span> </span><span>சிறப்பு</span><span> </span><span>சிறுநீர்ப்</span><span> </span><span>பரிசோதனை</span><span>, </span><span>சிறப்பு</span><span> </span><span>இரத்த</span><span> </span><span>பரிசோதனை</span><span> (</span><span>இரத்தத்தில்</span><span> BK </span><span>வைரஸுக்கு</span><span> </span><span>எதிரான</span><span> </span><span>உயிர்சத்துகளின்</span><span> (</span><span>ஆன்டிபாடீஸ்</span><span> - Antibodies) </span><span>அளவைப்</span><span> </span><span>பரிசோதித்தல்</span><span>), </span><span>சில</span><span> </span><span>சமயம்</span><span> </span><span>மாற்று</span><span> </span><span>சிறுநீரக</span><span> </span><span>சதைத்</span><span> </span><span>துணுக்கு</span><span> </span><span>பரிசோதனை</span><span> </span><span>ஆகியவற்றின்</span><span> </span><span>மூலம்</span><span> </span><span>அறியலாம்</span><span>. </span><span>இந்த</span><span> </span><span>பாதிப்பு</span><span> </span><span>உள்ளதாக</span><span> </span><span>உறுதி</span><span> </span><span>செய்யப்பட்டால்</span><span> </span><span>மாற்று</span><span> </span><span>சிறுநீரக</span><span> </span><span>மருந்துகளின்</span><span> </span><span>அளவைக்</span><span> </span><span>குறைக்க</span><span> </span><span>வேண்டியிருக்கும்</span><span>. </span><span>இதை</span><span> </span><span>உங்கள்</span><span> </span><span>சிறுநீரக</span><span> </span><span>மருத்துவ</span><span> </span><span>நிபுணர்</span><span> </span><span>முடிவு</span><span> </span><span>செய்வார்</span><span>.</span></p> <p class="MsoNoSpacing" style="text-align:justify; "><span><strong>ஆதாரம் :</strong> பத்மா கிட்னி சென்டர், ஈரோடு</span></p> </div>