<div id="MiddleColumn_internal"> <h3 style="text-align: justify;">அறிமுகம்</h3> <p style="text-align: justify;">ஜப்பானிய மூளையழற்சி மனிதர்களையும் விலங்குகளையும் தொற்றும் ஒரு வைரல் நோய் ஆகும். இது மனிதர்களுக்குக் கொசுவால் பரப்பப்படுகிறது. இதனால் மூளையைச் சுற்றி இருக்கும் மென்படலத்தில் அழற்சி உண்டாகிறது.</p> <p style="text-align: justify;">ஜப்பனிய மூளையழற்சி (JE) ஃபிளேவி வைரசால் (flavi virus) ஏற்படுகிறது. இது மூளையைச் சுற்றியுள்ள மென்படலத்தைத் தாக்குகிறது. பொதுவாக JE வைரசால் ஏற்படும் தொற்று இலேசானதாகவும் (காய்ச்சலும் தலைவலியும்) அல்லது தெளிவான அறிகுறிகள் இன்றியும் இருக்கும். ஆனால் 200-ல் ஒரு நோயாளிக்குத் தொற்று நோய் மிகக் கடுமையாக இருக்கும். அதிகக் காய்ச்சல், தலைவலி, கழுத்து விறைப்பு, தன்னிலையிழப்பு, ஆழ்மயக்கம், வலிப்பு, வலிப்புப் பக்கவாதம், மரணம் ஆகியவை ஏற்படும்.</p> <h3>நோயறிகுறிகள் (Symptoms)</h3> <p style="text-align: justify;">ஜாப்பானிய மூளையழற்சியின் நோயரும்பல் பருவம் 5-15 நாட்கள் ஆகும். பெரும்பாலான தொற்றுக்கள் அறிகுறிகளற்றவை ஆகும் (அதாவது 250-ல் ஒரு தொற்றே மூளை அழற்சியாக வளரும்).</p> <p style="text-align: justify;"><strong>ஆரம்ப அறிகுறிகளில் அடங்குவன:</strong></p> <ul> <li style="text-align: justify;">அதிகக் காய்ச்சல்- 38C (100.4F) அல்லது அதற்கு மேலும்</li> <li style="text-align: justify;">தலைவலி</li> <li style="text-align: justify;">நோய்வாய்ப் பட்ட உணர்வு</li> <li style="text-align: justify;">வயிற்றுப்போக்கு</li> <li style="text-align: justify;">தசை வலி</li> <li style="text-align: justify;">சில அரிய நோய் நேர்வுகளில் இவ்வாரம்ப அறிகுறிகள் ஒருசில நாட்கள் நீடிக்கும். பின் கடுமையான அறிகுறிகளாக மாறும்:</li> <li style="text-align: justify;">வலிப்பு</li> <li style="text-align: justify;">மனநிலை மாற்றம். இது சிறு குழப்பத்தில் இருந்து அதிக கலக்கம் அல்லது ஆழ்மயக்கமாகவும் மாறும்.</li> <li style="text-align: justify;">கட்டுப்படுத்த முடியாத உடல் நடுக்கம்</li> <li style="text-align: justify;">பேச்சிழத்தல்</li> <li style="text-align: justify;">தசை பலவீனம்</li> <li style="text-align: justify;">இயல்புக்கு மாறான தசையிறுக்கம் (அதி விறைப்பு)</li> <li style="text-align: justify;">நடுக்கம், விறைப்பு, மெதுவான இயக்கம், பக்கவாதம் போன்ற அசைவுப் பிரச்சினைகள்</li> <li style="text-align: justify;">கண்களின் அசைவுகளைக் கட்டுப்படுத்துவதில் சிக்கல்</li> <li style="text-align: justify;">முகத்தின் தசைகளைக் கட்டுப்படுத்துவதில் சிக்கல்.</li> </ul> <h3 style="text-align: justify;">காரணங்கள்</h3> <p style="text-align: justify;">ஜப்பானிய மூளையழற்சி ஃபிளேவி வைரசால் உண்டாகிறது. இவ்வகை அதிநுண்ணுயிரி விலங்குகளையும் மனிதர்களையும் பாதிக்கும். இது விலங்குகளில் இருந்து மனிதனுக்கு ஒரு தொற்றுள்ள கொசுவால் கடத்தப்படுகிறது.</p> <p style="text-align: justify;"><strong>ஆபத்துக்கான காரணிகளில் அடங்குவன</strong></p> <ul> <li style="text-align: justify;">நீங்கள் செல்லும் இடம்</li> <li style="text-align: justify;">செல்லும் ஆண்டின் காலநேரம்</li> <li style="text-align: justify;">நீங்கள் ஈடுபடும் செயல்கள்</li> </ul> <h3 style="text-align: justify;">நோய்கண்டறிதல்</h3> <ul> <li style="text-align: justify;">இரத்தப் பரிசோதனை: இரத்தத்தில் காணப்படும் நோயெதிர்பொருட்களை அறிய</li> <li style="text-align: justify;">இடுப்புப்பகுதி துளையிடல் இதுவும் தண்டுவட திரவத்திலும், முதுகுத் தண்டு திரவத்திலும் இருக்கும் நோயெதிர் பொருட்களை அறியவே செய்யப்படுகிறது.</li> </ul> <p style="text-align: justify;"><strong>வரைவிகள் (ஊடுகதிர்ப் படங்கள்——Scans): மூளையழற்சியாக இருந்தால்</strong></p> <p style="text-align: justify;"><strong>ஒரு கணினி வரைவிப்படம் (CT Scan)</strong></p> <p style="text-align: justify;">இது உடலை வெவ்வேறு சிறுசிறு கோணங்களில் தொடர் எக்ஸ்-கதிர் படங்களாக எடுத்துத் தொகுத்து உடலின் உட்பகுதியின் தெளிவான பிம்பமாகத் தருகிறது.</p> <p style="text-align: justify;"><strong>ஒரு காந்த அதிர்வு வரைவி பிம்பம் (MRI Scan)</strong></p> <p style="text-align: justify;">இது வலிமையான காந்தப் புலங்களையும் வானொலி அலைகளையும் பயன்படுத்தி உடலின் உட்பகுதியின் முழுமையான பிம்பத்தை உருவாக்குகிறது.</p> <p style="text-align: justify;">தேசிய இணைய தளம் (NHP), சுகாதாரத்தைப் பற்றிச் சிறந்த முறையில் புரிந்து கொள்ள சுட்டிக்காட்டும் தகவல்களைத் தருகின்றன. எந்த ஒரு நோய் கண்டறிதலுக்கும் மருத்துவத்திற்கும் நீங்கள் உங்கள் மருத்துவரையே நாட வேண்டும்.</p> <h3 style="text-align: justify;">சிக்கல்கள்</h3> <ul> <li style="text-align: justify;">கட்டுப்படுத்த முடியாதவாறு கைகள் நடுங்குதல்</li> <li style="text-align: justify;">ஆளுமை மாற்றம்</li> <li style="text-align: justify;">தசை வலிமை இழப்பு, கைகளும் புயமும் வெட்டி இழுத்தல்.</li> <li style="text-align: justify;">கற்பதில் மிதமான சிக்கல்</li> <li style="text-align: justify;">ஒரு மூட்டுப் பக்க வாதம்</li> <li style="text-align: justify;">உடலின் ஒரு புறம் பலவீனம் அடைதல்</li> </ul> <h3 style="text-align: justify;">தடுப்புமுறைகள்</h3> <p style="text-align: justify;">ஜப்பானிய மூளையழற்சியைத் தடுத்துக் கட்டுப்படுத்தும் வழிகள்:</p> <p style="text-align: justify;"><strong>(அ) தனிநபர் நிலையில்</strong></p> <ul> <li style="text-align: justify;">நோய்பரப்பிகளின் அடர்த்தியைக் கட்டுப்படுத்தும் வழிமுறைகளைக் கையாளவும்</li> <li style="text-align: justify;">கொசு கடியில் இருந்து காத்துக்கொள்ளும் வழிமுறைகளைப் பின்பற்றவும்</li> <li style="text-align: justify;">கொசு கடியில் இருந்து தப்பிக்கத் தகுந்த ஆடைகளை அணியவும் (குறிப்பாகக் கொசு அதிகமாகக் கடிக்கும் நேரங்களில்)</li> <li style="text-align: justify;">கொசு எதிர்ப்பு பசை, நீர்மம், சுருள், வில்லைகளைப் பயன்படுத்தவும்</li> <li style="text-align: justify;">பூச்சுக்கொல்லிகள் பூசப்பட்ட கொசுவலையை பயன்படுத்தவும்</li> <li style="text-align: justify;">கதவையும், ஜன்னல்களையும் நன்றாக மூடிவிட்டுத் தூங்கவும்.</li> <li style="text-align: justify;">குறிப்பாகப் பின் மாலைப் பொழுதில் அறையில் பூச்சுக்கொல்லிகளைத் தெளிக்கவும்</li> <li style="text-align: justify;">வீடுகளில் வலைகளைப் பொருத்தவும்.</li> <li style="text-align: justify;">DEET (டையீதைல்தொலுவாமைட்) சிறந்த கொசு விரட்டி ஆகும். இது தெளிப்பான், சுருள்கள், குச்சிகள், பசை வடிவங்களில் கிடைக்கிறது.</li> <li style="text-align: justify;">ஜப்பானிய மூளையழற்சி தடுப்பு மருந்து தடுப்பிற்கு முக்கியமானதாகும். மூன்று தடவைகளில் கொடுக்கப்படும் மருந்து பல ஆண்டுகள் பாதுகாப்பளிக்கும்.</li> </ul> <p style="text-align: justify;"><strong>(ஆ) சமுதாய நிலையில்</strong></p> <ul> <li style="text-align: justify;">பெரும் அளவில் பெருகும்போது மாலத்தியான் புகை எழுப்புதல்</li> <li style="text-align: justify;">நோய்பரப்பியைக் கண்டுபிடிக்க சமுதாய மக்களுக்கு உணர்வூட்டல்</li> <li style="text-align: justify;">கொசு பெருகுவதைத் தடுக்க சுற்றுப்புறங்களைச் சுத்தமாக வைத்தல்</li> <li style="text-align: justify;">பன்றி வளர்ப்பிடங்களைக் குடியிருப்புப் பகுதியில் இருந்து குறைந்தபட்சம் 4-5 கி.மீ. தள்ளி அமைக்க வேண்டும்.</li> <li style="text-align: justify;">அடிகுழாயைச் சுற்றி சிமிண்ட் பூசி வடிகால் அமைக்க வேண்டும்</li> </ul> <p style="text-align: justify;"><strong>(இ) பயணத்தின் போது தடுத்தல்</strong></p> <ul> <li style="text-align: justify;">பயணம் போகும் இடத்தில் இருக்கும் நோய் அபாயத்தை அறிய முயலவும். மருத்துவரிடம் ஆலோசனை பெறவும்.</li> </ul> <p style="text-align: justify;"><strong>(ஈ) கர்ப்ப காலத்தில் தடுத்தல்</strong></p> <ul> <li style="text-align: justify;">மருந்தூட்டிய / நீண்ட நாட்களுக்கான பூச்சியெதிர்ப்பு வலைகளைப் பயன்படுத்தவும்</li> <li style="text-align: justify;">மேல்குறிப்பிட்ட அனைத்து தனிநபர் தடுப்பு முறைகளும்</li> <li style="text-align: justify;">சில செய்யக் கூடியவையும் செய்யக் கூடாதவையும்</li> <li style="text-align: justify;">பூச்சி எதிர்ப்பு மருந்தை நேரடியாக முகத்தில் தெளிக்க வேண்டாம். கையில் தெளித்து பின் முகத்தில் தேய்க்கவும்</li> <li style="text-align: justify;">மருந்தை கீறல்கள், புண்கள் மீது பயன்படுத்த வேண்டாம்</li> <li style="text-align: justify;">கண்கள், உதடு, வாய் அருகிலும் காதுக்குள்ளும் மருந்தைத் தவிர்க்கவும்.</li> <li style="text-align: justify;">குழந்தைகள், பிள்ளைகளுக்கு மருந்திட உதவுங்கள். குழந்தைகள் தாமாகவே மருந்தைப் பூச அனுமதிக்க வேண்டாம்.</li> <li style="text-align: justify;">வெயில் தடுப்புப் பசை பூசுவதாக இருந்தால் பூசிய பின் மருந்தைப் பூசவும்</li> <li style="text-align: justify;">மருந்தைப் பயன்படுத்திய பின் கைகளை நன்றாகக் கழுவவும்</li> <li style="text-align: justify;">தோலிலிருந்து மருந்தை சோப்பால் கழுவவும்</li> <li style="text-align: justify;">கொசுவிரட்டி மருந்துப்பெட்டியில் எழுதப்பட்ட ஆலோசனைகளைப் பின்பற்றவும்.</li> </ul> <h3 style="text-align: justify;">சிகிச்சை</h3> <p style="text-align: justify;">ஜப்பானிய மூளையழற்சிக்குத் தனிப்பட்ட மருத்துவம் எதுவுமில்லை. ஆதரவு மருத்துவமே அளிக்கப்படுகிறது. நோய் அறிகுறிகளைக் கட்டுப்படுத்தி சிக்கல்கள் வளராமல் தடுக்க நடவடிக்கைகள் மேற்கொள்ளப்படுகின்றன.</p> <p style="text-align: justify;">ஆதாரம்: தேசிய சுகாதார இணையதளம்</p> </div>