<div id="Middlecolumn_internal"> <h3>நோக்கம்</h3> <p style="text-align: justify;">ஊரகப் பகுதிகளிலுள்ள ஊராட்சி ஒன்றிய ஆரம்ப மற்றும் நடுநிலை பள்ளிகளுக்குத் தேவையான உள்கட்டமைப்பு வசதிகளான, புதிய கட்டடங்கள், சமையல் அறை, குடிநீர் வசதி, கழிப்பறைகள் ஆகியவைகளை ஏற்படுத்துதல் மற்றும் தேவைப்படும் இடங்களில் பழுது பார்த்தல் மற்றும் புதுப்பித்தல் இத்திட்டத்தின் முக்கிய நோக்கமாகும்.</p> <h3>பணிகள் தேர்வு செய்தல்</h3> <p style="text-align: justify;">மாவட்ட அளவில் அமைக்கப்பட்ட குழுக்கள் மூலம் பள்ளிகளுக்குத் தேவையான அடிப்படை வசதிகள் குறித்து விரிவாக ஆய்வு மேற்கொண்டு பணிகள் தேர்வு செய்யப்படும்.</p> <h3>நிதி ஒதுக்கீடு</h3> <p style="text-align: justify;">2014-15 ஆம் ஆண்டுக்கு இத்திட்டத்திற்கான நிதி ஒதுக்கீடு ரூ. 100 கோடி ஆகும்.</p> <p style="text-align: justify;"><strong>எடுக்கப்படும் பணிகள் பள்ளிக் கட்டடங்கள்</strong></p> <ul> <li style="text-align: justify;">ஊராட்சி ஒன்றியப் பள்ளிகளில் பயிலும் மாணவர்களின் எண்ணிக்கைக்கேற்ப புதிய பள்ளிக் கட்டடங்கள் அனைத்தும் தட்டு ஓடு பதித்த கான்கிரீட் கூரைகளுடன் தண்ணீர் கசியாத வகையில் கட்டப்படும்.</li> <li style="text-align: justify;">புதிய பள்ளிக் கட்டடங்கள் பள்ளி வளாகத்தில் அமைந்துள்ள காலி இடத்தில் அமைக்கப்படும்.</li> <li style="text-align: justify;">பள்ளிக் கட்டடம் கட்டுவதற்கு காலி இடம் இல்லாத நிலையில், ஏற்கனவே உள்ள கான்கிரீட் கட்டடத்தின் உறுதித் தன்மையை சரி பார்த்து அதன் மேல் தளத்தில் புதிய கட்டடம் அமைக்கப்படும்.</li> <li style="text-align: justify;">ஏற்கனவே உள்ள பழுதடைந்த பள்ளிக் கட்டடங்கள் சீரமைக்கப்படும்.</li> </ul> <h3>சமையல் அறை</h3> <ul> <li style="text-align: justify;">சமையல் அறை இல்லாத ஊராட்சி ஒன்றியப் பள்ளிகளில் புதிய சமையல் அறைகள் கட்டப்படும். தேவையின் அடிப்படையில் பழுது பார்த்தல் / புதுப்பித்தல் பணி மேற்கொள்ளப்படும்.</li> <li style="text-align: justify;">ஏற்கனவே உள்ள சமையல் அறை கட்டடத்தில் மதிய உணவுத் திட்டத்திற்குத் தேவையான உணவுப் பொருட்களை இருப்பு வைத்துக் கொள்ளும் கூடுதல் அறைகளும் தேவையின் அடிப்படையில் எடுத்துக்கொள்ளப்படும்.</li> </ul> <h3>குடிநீர் வசதி</h3> <ul> <li style="text-align: justify;">ஊராட்சி ஒன்றியப் பள்ளிகளில் ஏற்கெனவே உள்ள குடிநீர் வசதி அமைப்புகள் பழுதடைந்து இருப்பின் அவை பழுது நீக்கிச் சீரமைக்கப்படும்.</li> <li style="text-align: justify;">குடிநீர்க் குழாய் நீட்டிப்பு பணிகள், தேவைப்படும் இடங்களில் ஊராட்சியில் உள்ள ஆழ்குழாய் கிணறுகளிலிருந்து புதிய குடிநீர் இணைப்புகள் தேவைப்படும் இடங்களில் ஏற்படுத்தப்படும்.</li> <li style="text-align: justify;">அவசியமான இடங்களில் புதிய ஆழ்துளை கிணறு அமைக்கப்படும்.</li> </ul> <h3>கழிப்பறை வசதிகள்</h3> <ul> <li style="text-align: justify;">அனைத்து ஊராட்சி ஒன்றியப் பள்ளிகளிலும் பயிலும் மாணவ, மாணவிகளுக்குத் தனித்தனியாக, போதுமான அளவில் கழிப்பறைகள் கட்டப்படும்.</li> <li style="text-align: justify;">நடுநிலைப் பள்ளிகளில் மாணவிகளின் வசதிக்காக எரியூட்டிகள் அமைக்கப்படும்.</li> <li style="text-align: justify;">முழு சுகாதாரத் திட்டத்தின் கீழ் புதிய கழிப்பறைகள் அமைக்க போதிய நிதி இல்லையெனில், இத்திட்டத்தின் கீழ் புதிய கழிப்பறைகள் கட்டித் தரப்படும்.</li> </ul> <h3>இதர பணிகள்</h3> <ul> <li style="text-align: justify;">தேவைகளுக்கேற்ப பள்ளிகளுக்கு சுற்றுச்சுவர் மற்றும் மிதிவண்டி நிறுத்தம் போன்ற பணிகளும் மேற்கொள்ளப்படும்.</li> <li style="text-align: justify;">பேரூராட்சிகள் மற்றும் மூன்றாம் நிலை நகராட்சி பகுதிகளில் உள்ள ஊராட்சி ஒன்றியப் பள்ளிகளிலும் இத்திட்டம் செயல்படுத்தப்படும்.</li> </ul> <p style="text-align: justify;">திட்டத்தில் பயன்பெற மற்றும் திட்டத்தைப் பற்றிய இதர விவரங்களை பெற அணுக வேண்டிய அலுவலர்கள்:</p> <ul> <li style="text-align: justify;">மாநில அளவில்: ஊரக வளர்ச்சி மற்றும் ஊராட்சி ஆணையர், சென்னை-15</li> <li style="text-align: justify;">மாவட்ட அளவில்: மாவட்ட ஆட்சித் தலைவர் மற்றும் திட்ட இயக்குநர், மாவட்ட ஊரக வளர்ச்சி முகமை</li> <li style="text-align: justify;">வட்டார அளவில்: வட்டார வளர்ச்சி அலுவலர் (வட்டார ஊராட்சி)</li> </ul> <p style="text-align: justify;">ஆதாரம்: தமிழ்நாடு மகளிர் மேம்பாட்டு நிறுவனம்</p> </div>